უკრაინაში ჩასული “ერთიანი ნაციონალური მოძრაობის” წევრები სხვადასხვა შეხვედრებს მართავენ. იყო შეხვედრა უკრაინაში მებრძოლ ქართველ მეომრებთან. შეხვედრის შემდეგ სოციალურ ქსელში პოსტს აქვეყნებს და მხარდაჭერას უცხადებს რუსეთის წინააღმდეგ მებრძოლ მეომრებს “ნაციონალური მოძრაობის” თავმჯდომარე, ნიკა მელია:
“ჩემთვის დიდი პატივია ვიდგე იმ ბიჭების გვერდით, ვინც სიცოცხლის ფასად იცავს თავისუფლებას, ვინც უკრაინაში იბრძვის როგორც უკრაინის, ისე საქართველოს თავისუფლებისთვის.
არსებითი მნიშვნელობა არ აქვს სად იბრძვი თავისუფლებისთვის, ბოროტების დასამარცხებლად – თავისუფლებისთვის ბრძოლა არ ცნობს გრძედებს და განედებს. საამაყო და მისაბაძია ყველა მებრძოლი, რომელიც იბრძვის მტარვალების წინააღდეგ და მე, ნამდვილად მეამაყება დღეს მათ გვერდით დგომა, თავად მმატებს მხნეობას მათი გამხნევება!
ჩვენი ბიჭები გმირულად, უკომპრომისოდ იბრძვიან ყველგან, სადაც კი მძიმე ბრძოლები მიდის, სადაც კი წყდება ომისა და მშვიდობის ბედი, სადაც იწერება ახალი ევროპის, ახალი მსოფლიოს ისტორია.
ეს ისტორია იწერება გმირების სისხლით, მათ შორის, ქართველი გმირების სისხლით!
ქედს ვიხრი ბრძოლის ველზე დაცემული ყველა მებრძოლის გმირობისა და მარადიული ხსოვნის წინაშე. ვიზიარებ მათი ოჯახების ღრმა მწუხარებას!” – წერს ფეისბუქის საკუთარ გვერდზე ნიკა მელია.