“პოლიტიკური პლატფორმა – ახალი საქართველოს” გენერალური მდივანი, პაატა მანჯგალაძე ახდენს რა ქვეყანაში მიმდინარე პოლიტიკური პროცესების შეფასებას, ყურადღებას ამახვილებს ბიძინა ივანიშვილის პოლიტიკური ბრძოლის ტაქტიკაზე და მიაჩნია, რომ ყველა მისი მცდელობა განწირულია მარცხისთვის:
“ბიძინა ივანიშვილის ყველა ქმედება დაკავშირებულია და მომდინარეობს ხელისუფლების შენარჩუნების ამოცანიდან და რაც დრო გადის, უფრო და უფრო სცდება საქართველოს სასიცოცხლო ინტერესებსა და საღი გონების ლოგიკას. მხედველობაში მაქვს “გავრილოვის ღამე”, გახარიას გმირად წარმოჩინება, რუსთავი 2-ის ხალვაშისთვის ელვისებური სისწრაფით გადაფორმება და სხვა ქმედებები.
ჩვენ ვხედავთ როგორ მოქმედებს ხელისუფლების შენარჩუნების ინსტინქტის ბიძინასეული მექანიზმი, რომელიც, ძირითადად, შიშზე და ადამიანური სისუსტეებით მანიპულირებაზეა დაფუძნებული. იგი ცდილობს, რომ ქვეყანაში არსებული რეალობა წარმოაჩინოს ისე, თითქოს მხოლოდ ის არის სტაბილურობის და კეთილდღეობის გარანტი, ხოლო ყველა სხვა მხოლოდ არეულობას და ძალმომრეობას უქადის ქვეყანას. მისი მიზანია, ხელი შეუშალოს ცალკეული გავლენიანი პოლიტიკური ინდივიდების შეთანხმებულ მოქმედებას, ერთმანეთის მიმართ უნდობლობის გაჩენის გზით და ამისთვის იყენებს ისეთ საშუალებებს, როგორიცაა პოტენციურად “საფრთხის” შემცველი ლიდერების იზოლაცია, მოსყიდვა, მორალური ტერორი და სხვა.
ეს ყველაფერი აჩვენებს, რომ ის გრძნობს თავის სისუსტეს და ეშინია ჩვენი, რადგან ზუსტად იცის, რომ მას იცავს არა ხელისუფლება, არამედ ხელისუფლების პაროდია, რომელსაც თვითგადარჩენის ინსტინქტები მისი ჩარევის გარეშე საერთოდაც არ გააჩნია.
ხელისუფლების შენარჩუნების ყველა მანიპულაცია განწირულია მარცხისთვის და ხალხთან წინააღმდეგობით დროის გაწელვა მხოლოდ ზამბარის ეფექტის მატარებელი იქნება მისთვის, რომელიც უფრო ეფექტურად და უფრო შორს გასტყორცნის პოლიტიკურ მოუსავლეთში” – აცხადებს პაატა მანჯგალაძე.
