სტრასბურგის სასამართლოს მიერ მიხეილ სააკაშვილთან მიმართებაში წარდგენილი სარჩელის დასაშვებლობასთან დაკავშირებით მოსალოდნელი გადაწყვეტილების თაობაზე სოციალურ ქსელში პოსტს აქვეყნებს მე-3 პრეზიდენტის ადვოკატი ნიკა გვარამია და კონკრეტულ ეჭვებს გამოთქვამს ინფორმაციის გაჟონვასთან დაკავშირებით:
“არა ბიჭო და დაგინდობთ 😈
ოღონდ, აუცილებლად მოგიწევთ განმარტებების გაკეთება იუსტიციის სამინისტროს და მდინარაძეს, საიდან იცით წინასწარ სასამართლო რას და როგორ იზამს.
ასეთი დასაბუთებული ეჭვები ინფორმაციის გაჟონვასთან დაკავშირებით უკვე იყო რ2ის საქმეზე, ახლა უკვე დასაბუთებაც არ სჭირდება.
ახსნა-განმარტებების გაკეთება მოუწევს ეროვნულ მოსამართლესაც (ლ. ჭანტურია) და საქმეზე მომუშავე სასამართლოს ქართველ სტაფერებსაც“, – წერს ნიკა გვარამია ფეისბუქის პირად გვერდზე.
ინფორმაციისთვის: ტელეკომპანია “იმედის” ეთერში პარტია “ქართული ოცნების” აღმასრულებელმა მდივანმა, მამუკა მდინარაძემ განაცხადა, რომ მსჯავრდებული მიხეილ სააკაშვილის საჩივარმა სტრასბურგში შეიძლება გადალახოს დასაშვებლობის ეტაპი, რასაც საქართველოს მე-3 პრეზიდენტის დაცვის მხარე და მხარდამჭერები პიარულ გამარჯვებად გამოაცხადებენ, რაც მდინარაძის თქმით არაა ლოგიკური, რადგანაც ეს არ ნიშნავს რომ სასამართლომ გაამართლა.
