სპეციალური საგამოძიებო სამსახური განცხადებას ავრცელებს “ცხელ ხაზზე” მიღებული ინფორმაციის საფუძველზე დაწყებული გამოძიების თაობაზე:
“2022 წლის 18 მარტს, სპეციალური საგამოძიებო სამსახურის “ცხელ ხაზზე” მიღებული ინფორმაციის საფუძველზე, საგამოძიებო სამსახურში დაიწყო გამოძიება ტელეკომპანია “მთავარი არხი”-ს გადამღები ჯგუფისთვის ჟურნალისტურ საქმიანობაში უკანონოდ ხელის შეშლის ფაქტზე, საქართველოს სისხლის სამართლის კოდექსის 154-ე მუხლის მეორე ნაწილით.
სპეციალური საგამოძიებო სამსახური შემჭიდროვებულ ვადებში ჩაატარებს ყველა საჭირო საგამოძიებო და საპროცესო მოქმედებას“, – ნათქვამია გავრცელებულ განცხადებაში.
ინფორმაციას სპეციალური საგამოძიებო სამსახურის საზოგადოებასთან ურთიერთობის სამსახური ავრცელებს
ინფორმაციისთვის: ფაქტთან დაკავშირებით ტელეკომპანია “მთავარი არხი” განცხადებას ავრცელებს.
“თავდასხმა “მთავარი არხის” გადამღებ ჯგუფზე. ზუგდიდში, ემა გოგოხიასა და მის ოპერატორს თავს “ალტ-ინფოს” ოფისში დაესხნენ.
ცნობილია, რომ გადამღები ჯგუფი ადგილზე იმის გადასაღებად მივიდა, რომ ოფისის შენობაზე უკრაინის მხარდამჭერ წარწერებს ქალაქის მერიის დაქვემდებარებაში მყოფი აიპის თანამშრომლები შლიდნენ. სწორედ ამ მასალის გადაღების დროს, როგორც ემა იხსენებს, ოფისთან დაახლოებით 4 მანქანა ერთდროულად გაჩერდა, კასტეტებით შეიარაღებულმა პირებმა ჩვენს ოპერატორსა და ჟურნალისტს ფიზიკური შეურაცხყოფა მიაყენეს.
ცნობილია, რომ რამდენიმე მოძალადე პოლიციამ უკვე დააკავა“.
