რუსული სამხედრო შესაძლებლობები უკრაინაში იწურება. ომის ყოველი მომდევნო დღე პუტინის ხელისუფლებისთვის დასასრულის დასაწყისია. სუვერენულ სახელმწიფოზე აგრესია ცივილურმა მსოფლიომ რომ დაგმო არავისთვის სიახლეს აღარ წარმოადგენს. ეს ტენდენცია შესაძლოა ამ ეტაპზე სუსტად, მაგრამ რუსეთის შიგნითაც იგრძნობა. პუტინისადმი უკმაყოფილება ნელ-ნელა იზრდება. მოსკოვისა და სხვა დიდი ქალაქების ქუჩებში მოსახლეობის ნაწილი, მოთხოვნით „არა ომს“, უკვე გამოდის. რუსეთის ძალიან ბევრი მოქალაქე (ძირითადად მამაკაცები) ტოვებს ქვეყანას, რათა მათი გაწვევა შეიარაღებულ ძალებში არ მოხდეს. სანქციების გამო რუსეთის სულ მცირე ასი ათასმა მოქალაქემ უკვე დაკარგა სტაბილური სამუშაო. რუბლის კურსი დოლართან და ევროსთან მიმართებაში მნიშვნელოვნად ეცემა. მაღაზიებში პირველადი მოხმარების საგნები და მედიკამენტები დეფიციტური გახდა. უფრო მძიმე დღეები ელოდება ქვეყანას მომავალში, როდესაც უცხოური პროდუქციის არსებული მარაგები ამოიწურება, ხოლო სანქციების გამო შევსება შეუძლებელი იქნება.
ჩვეულებრივ ხალხთან ერთად ოლიგარქებიც ტოვებენ ქვეყნის ტერიტორიას. მათი ქმედებები ჯერ კიდევ არ არის იმის მიმანიშნებელი, რომ ეს აშკარა დემარშია ოფიციალური მოსკოვის პოლიტიკის წინააღმდეგ, მაგრამ ფაქტია, რომ საკუთარი ტყავის და ქონების გადასარჩენად უფრო მეტზეც არიან წამსვლელები. მით უმეტეს, რომ რუსეთის საზღვრებს გარეთ არსებული დიდი რაოდენობით მათი აქტივების კონფისკაცია უკვე მოხდა და ეს პროცესი არ შეჩერდება.
ბოლო მონაცემებით, სანქციების გამო, ყველაზე მდიდარმა რუსებმა 80 მილიარდ აშშ დოლარზე მეტი ღირებულების აქტივები დაკარგეს. დღევანდელი მსოფლიო ეკონომიკა იმდენად დივერსიფიცირებულია, რომ პუტინის „ფულის ქისებს“, თუ თავის გადარჩენა სურთ, სხვა შესაძლებლობა აღარ გააჩნიათ გარდა იმისა, რომ ცივილური სამყაროს მხარეს დადგნენ და რუსეთის პრეზიდენტს ზურგი აქციონ. მნიშვნელოვანია ამ ხალხთან საერთო ენის გამონახვა, რადგან მხოლოდ მათ, ძალოვანებთან ერთად, ხელეწიფებათ პუტინის ხელისუფლებიდან ჩამოშორება.
კრემლის ელიტა კარგად ხვდება, რომ პუტინის პიროვნება უკვე ტოქსიკურია და მისი მოშორება გარდაუვალია. სანამ ეს უკანასკნელი სხვადასხვა სახელისუფლო კლანებს შორის ძალთა ბალანსს ინარჩუნებდა და თავის გარემოცვას გამდიდრების საშუალებას აძლევდა, ელიტებისთვის კიდევ მისაღები პიროვნება იყო, მაგრამ დამოკიდებულება რადიკალურად შეიცვალა მას შემდეგ რაც 22 წლის განმავლობაში ასე „რუდუნებით“ დაგროვილ ქონებას საფრთხე დაემუქრა.
პუტინის გარშემო შავი ღრუბლები იკრიბება და ამას თავად კარგად გრძნობს. ჯერ კიდევ მიდის კრემლის კლანებს შორის კულუარული ბრძოლები ძალაუფლებისთვის, სადაც ყველა მხარე ცდილობს უპირატესობის მოპოვებას. სანამ „მეფეს“ ჯერ კიდევ ხელი მიუწვდება გარკვეულ რესურსებზე პუტინის ფიგურა მოთხოვნადი იქნება, მაგრამ მერე დაიწყება უკუპროცესები, რომელიც დამღუპველი იქნება რუსეთის პრეზიდენტისთვის.
„აკილამ“ უკვე ააცილა და ეს ფიასკო უკრაინაში ჩაშლილი ბლიცკრიგია. პუტინი ყველანაირად ეცდება, რომ წარუმატებლობაზე პასუხისმგებლობა სხვას აჰკიდოს და ამით ნეგატივი თავიდან აირიდოს. განტევების ვაცად თავდაცვის მინისტრი შოიგუა შერჩეული. პრეზიენტმა ხელი მოაწერა ბრძანებას, რომელიც უკრაინაში დივერსიული მოქმედებების ჩასატარებლად გამოყოფილი 5 მილიარდი აშშ დოლარის მოპარვის ფაქტის შესწავლას ეხება. ეს პირდაპირი დავალებაა პროკურატურისათვის, რათა თავდაცვის სამინისტროს მაღალჩინოსნების სამაგალითო დასჯა დაიწყოს. საზოგადოებამ უნდა დაინახოს, რომ ამ ომში დაღუპული უკრაინის ათიათასობით მშვიდობიანი მოსახლე და რუსი ჯარისკაცი არა მისი, არამედ სამხედროების ნამუსზეა.
ბუნებრივია, კრემლში ერთმანეთთან დაპირისპირებული ჯგუფები პუტინს ამ თამაშში აჰყვებიან, რადგან შოიგუს მოწინააღმდეგე მხარე, თავდაცვის მინისტრს, პრეზიდენტის ხელით მოიშორებს. ზოგიერთი ექსპერტის ინფორმაციით პუტინი იმდენად ენდობოდა თავდაცვის მინისტრს, რომ პირადი დაცვის თანამშრომლების როტაცია „გრუ“-ს ოპერებითაც მოხდა, ხოლო თავად იგი პუტინის მემკვიდრედაც განიხილებოდა. მაგრამ უკრაინის წარუმატებლობამ სახელისუფლო ძალთა ბალანსი რადიკალურად შეცვალა.
შოიგუს გაწირვა ტაქტიკური და არა სტრატეგიული სვლა იქნება პუტინისთვის. მომავალშიც ამ უკანასკნელისგან სტრატეგიულის ნაცვლად, მხოლოდ ტაქტიკურ ნაბიჯებს უნდა ველოდოთ (მაგალითად, ლავროვის უწყებამ გააჟღერა, რომ უკრაინაში შეჭრის მიზეზი ატომური იარაღის შექმნის მცდელობის აღკვეთა იყო), რაც ხელისუფლებაში ყოფნის ვადას უმნიშვნელოდ გაუხანგძლივებს, მაგრამ ეს არ იქნება არც მისთვის და არც რუსი ხალხისთვის გამოსავალი…
ავტორი
ალექსი ნონიაძე
სააგენტო “პარალელის” ექსპერტი, ანალიტიკოსი
