უცხოური ვალუტის მასის შემოდინება საქართველოში რამდენიმე არხით ხორციელდება, მათ შორის მთავარია: ექსპორტი, ტურიზმი, პირდაპირი უცხოური ინვესტიციები და ფულადი გზავნილები. რუსეთ-უკრაინის ომმა და კოლექტიური დასავლეთის მიერ დაწესებულმა სანქციებმა, ეს მოცემულობა შესაძლოა მნიშვნელოვნად შეცვალოს.
ჩვენს წინა სტატიაში უკვე ვსაუბრობდით, რომ უკრაინის ომი მნიშვნელოვან კორექტირებას შეიტანდა საერთაშორისო ვაჭრობაში. ვსაუბრობდით პროდუქციის ტოპ ათეულზე, რომელიც უკრაინიდან იმპორტით შემოდის და საქართველოდან ექსპორტით გადის.
რუსეთისთვის დაწესებული სანქციები კითხვის ნიშნის ქვეშ დააყენებს ფულად გზავნილებსაც, რომელსაც ჩვენი თანამემამულეები აგზავნიან რუსეთიდან საქართველოში. 2022 წლის იანვრის მონაცემებით რუსეთის ფედერაციიდან საქართველოში 22.38 მლნ. აშშ დოლარის ოდენობის ფულადი გზავნილი განხორციელდა, რაც მთლიანი გადმორიცხვების 13.26%-ია, ხოლო წლიურმა ზრდა მინუს 3.43% შეადგინა.
უკრაინის წილი ფულად გზავნილებში 5.48 მლნ. აშშ დოლარია, რაც მთლიანი გადმორიცხვების 3.24%-ს წარმოადგენს.
წყარო: საქართველოს ეროვნული ბანკი
ავტორი
ალექსი ნონიაძე
სააგენტო “პარალელის” ექსპერტი, ანალიტიკოსი