“დავაყენეთ საკითხი, უკრაინასთან ერთად, საქართველოს დაჩქარებული წესით ევროკავშირში გაწევრიანების შესახებ” – გიორგი ვაშაძე

„სტრატეგია აღმაშენებლის“ თავმჯდომარე „ALDE“-ს (ლიბერალებისა და დემოკრატების ალიანსი ევროპისთვის) ლიდერებთან შეხვედრისას, საქართველოს უკრაინასთან ერთად დაჩქარებული წესით ევროკავშირში გაწევრიანების ინიციატივით გამოვიდა. გიორგი ვაშაძემ ევროპული ქვეყნების ლიდერებს მიმართა და აღნიშნა, რომ ძალების გაერთიანება ახლა ყველაზე მნიშვნელოვანია, რადგან ევროკავშირში საქართველოს გაწევრიანება ერთადერთი გზაა, რომ თავიდან ავირიდოთ აგრესია. ვაშაძის თქმით დღეს ყველაზე დიდი პრობლემა საქართველოს მთავრობის დუმილია, რამაც პროცესებიდან ამოვარდნა შეიძლება გამოიწვიოს

„მე და ჩემმა კოლეგებმა ამ წუთებში დავასრულეთ ევროპული ლიბერალური პარტიის ლიდერებთან შეხვედრა ჩვენს პარტნიორებთან, „რესპუბლიკური პარტიის“ და „თავისუფალ დემოკრატებთან“ ერთად. დავაყენეთ საკითხი, უკრაინასთან ერთად, საქართველოს დაჩქარებული წესით ევროკავშირში გაწევრიანების შესახებ. დღეს ყველაზე დიდი პრობლემა არის ის, რომ საქართველოს მთავრობა, ამ საკითხთან დაკავშირებით, დუმს და შესაძლებელია, ამოვვარდეთ ამ პროცესიდან.

პოლონეთი გამოვიდა უკვე ამ ინიციატივით, რასაც რუმინეთის და სხვა ევროპული ქვეყნების თანხმობა მოჰყვა. ამიტომ, ძალიან მნიშვნელოვანია, ყველამ გავაერთიანოთ ძალისხმევა ამ მიმართულებით. ეს არის ერთადერთი გზა იმისთვის, რომ თავიდან ავირიდოთ აგრესია და საქართველომ შეძლოს მშვიდობიანი, თავისუფალი განვითარება!“- განაცხადა გიორგი ვაშაძემ.

ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს