“ბიძინა ივანიშვილო და ირაკლი ღარიბაშვილო, ქართველი ერის სახელით უნდა შეუერთდეთ იმ სანქციებს, რომელიც დაუწესა ევროკავშირმა საჰაერო სივრცესთან დაკავშირებით” – ნიკა მელია

უკრაინაში მიმდინარე ომსა და საერთაშორისო რეაქციის შესახებ ისაუბრა საგანგებო ბრიფინგზე “ერთიანი ნაციონალური მოძრაობის” თავმჯდომარემ, ნიკა მელიამ. ამასთან ერთად ოპოზიციონერი ლიდერი სპეციალურ მიმართვას ავრცელებს ბიძინა ივანიშვილისა და საქართველოს მთავრობისადმი, რომ მიღებული იქნას გადაწყვეტილება რუსეთის მიმართ კონკრეტულ სანქციებთან დაკავშირებით:

“სამი დღეა, ჩვენი მეგობარი გმირი ერის შვილები – ბავშვები, ქალები, მამაკაცები, ბებიები და ბაბუები ებრძვიან ბოროტებას, იგერიებენ მტერს და არ უშვებენ საკუთარ კარ-მიდამოში, ეზოებში, სკვერებში და სადარბაზოებში.

ამ უპრეცენდენტო სამდღიანმა გმირულმა ბრძოლამ ჩვენი უკრაინელი მეგობრებისა, გამოიწვია მთელი მსოფლიოს კონსოლიდაცია გმირი უკრაინელების გარშემო.

ევროკავშირმა პირველად ისტორიაში, უკანასკნელი 70 წლის მანძილზე, მიიღო გადაწყვეტილება, რომ იარაღი მიაწოდოს ომში ჩართულ სახელმწიფოს, იმიტომ რომ ისინი არიან მართლები როგორც არასდროს.

დიდი ბრიტანეთი და პოლონეთი ომში მყოფ სახელმწიფოს და ჩვენს მეგობარ უკრაინელებთან ალიანსს ქმნიან.

შვედეთი პირველად ისტორიაში იღებს გადაწყვეტილებას სამხედრო დახმარების აღმოსაჩენად .
კანადა ასევე აწვდის იარაღს უკრაინელებს.

ყველა ცივილიზებული სახელმწიფო დღეს დგას სიმართლის გვერდით.

და ამ დროს, სად არის ქართველი ხალხის ხელისუფლება.

მაშინ როდესაც, ლიეტუვა, ესტონეთი, ლატვია გვერდში უდგანან ჩვენს ძმებს უკრაინელებს.
მაშინ როდესაც, ჩვენზე ღარიბი ქვეყნის, მოლდოვას პრეზიდენტი უკრაინა-მოლდოვას საზღვართან ჩადის და საკუთარი პატრონაჟის ქვეშ აქცევს იქიდან დევნილ ქალებსა და ბავშვებს – ამ დროს სად არის ჩვენი ქვეყნის ხელისუფლება.

მე დარწმუნებული ვარ, ომის დაწყებამდე ნებისმიერი უკრაინელისთვის რომ ეკითხათ, ომის დაწყების შემთხვევაში პირველი რომელი სახელმწიფო დაუდგებოდა გვერდში, ასიდან ასი უკრაინელი იტყოდა, რომ საქართველოს ხელისუფლება.

მაგრამ ჩვენდა სამარცხვინოდ, ეს ყველაფერი საპირისპიროდ მოხდა – არც ხმა, არც ჩამიჩუმი ჩვენი ხელისუფლების მხრიდან.

მიმაჩნია, მაშინ როცა, ევროკავშირმა მიიღო უპრეცენდენტო გადაწყვეტილება და მთელი საჰაერო სივრცე ჩაუკეტა რუსეთს და ამითაც იცავს უკრაინელ ძმებსა და დებს, როდესაც აზერბაიჯანიც კი საწვავს აწვდის უკრაინას, როდესაც თურქეთი, ისტორიაში მეორედ ბოსფორის სრუტეს სამხედრო გემებისთვის კეტავს და ამითაც ეხმარება უკრაინას რუსეთთან ომში, ამ დროს ჩვენმა ხელისუფლებამ არაფერი უნდა გააკეთოს?

ხვალ სამუშაო დღე იწყება ბიძინა ივანიშვილო და ირაკლი ღარიბაშვილო და თქვენ, ქართველი ერის სახელით უნდა შეუერთდეთ იმ სანქციებს, რომელიც დაუწესა ევროკავშირმა საჰაერო სივრცესთან დაკავშირებით – ეს ერთი მოთხოვნა.

და ასევე მეორე მოთხოვნა – უნდა აიკრძალოს სწრაფადვე პუტინის რუსეთის პროპაგანდისტული მედია საშუალებების ოპერირება ქვეყანაში.

ეს არ არის ის პლატფორმა, საიდანაც ტირაჟირდება ახალი ამბები. ეს არის ის პლატფორმა, სადაც ჩვენი ქვეყნის თავისუფლება და ღირსება ილახება.

რატომ უდგანან გვერდში ჩვენს უკრაინელ დებსა და ძმებს, იმიტომ რომ იცავენ მთელს მსოფლიოში ღირსებას, თავისუფლებას და თავმოყვარეობას და ჩვენ არ ვჩანვართ.

ამიტომ, ეს ორი მოთხოვნა – ქართული საჰაერო სივრცე უნდა ჩაიკეტოს პუტინის რუსეთისთვის და ამით დავიცვათ უკრაინა და მთელი ეს პროპაგანდისტული არხები პუტინის რუსეთისა, საქართველოში აღარ უნდა მაუწყებლობდნენ“, – აცხადებს ნიკა მელია.