პარტია ,,ლელოს“ გენერალურ მდივანს, ბადრი ჯაფარიძეს მმართველმა პარტიამ დეპუტატის უფლებამოსილება შეუწყვიტა. ამასთან დაკავშირებით ოპოზიციონერი ლიდერის აცხადებს – ,,ეს ზრდის ჩვენს მოტივაციას იმისათვის, რომ ვიბრძოლოთ სახელმწიფოს განსათავისუფლებლად მიმტაცებელთა ხელიდან“:
,,ქართულმა ოცნებამ“ მხარი დაუჭირა ჩემი მანდატის, სადეპუტატო უფლება-მოსილების შეწყვეტას. ეს მეორედ ხდება ჩემს პოლიტიკურ ცხოვრებაში. პირველად შემიწყვიტა სახელმწიფო გადატრიალებამ, ახლა – მიტაცებულმა სახელმწიფომ.
რა თქმა უნდა, ეს არის შედეგი იმის, რაც ხდება ჩვენს ქვეყანაში – სახელმწიფო არის მიტაცებული. შესაბამისად, გადაწყვეტილებები, რომლებიც მიიღება არის უკანონო, უსამართლო, ჩვენი ხალხის ინტერესების საწინააღმდეგო.
მთელი ეს პერიოდი, რაც დაიწყო ჩვენი დევნა – ჩემი და მამუკა ხაზარაძის, ყველა რეპრესიული მექანიზმი, რაც კი შეიძლება ამოქმედებულიყო, იქნა გამოყენებული. კერძოდ, სისხლის სამართლის საქმის აღძვრა, ძალით განთავისუფლება დაკავებული თანამდებობებიდან, ანაკლიის პროექტის გაჩერება, ინვესტიციების ექსპროპრიაცია, სასამართლო გადაწყვეტილება, რომელიც ცდება ყველა სამართალს, ყველა პრეცენდენტსაც კი – არ არსებობს ასეთი პრეცედენტი, ისეთი გადაწყვეტილება დააწერინეს მოსამართლეს, რომლის ამოცანა იყო ერთადერთი – რეპუტაციის შელახვა და შემდგომ, როგორც ჩანს, ამის დაგვირგვინება იყო ის, რომ ,,ქართული ოცნების“ დეპუტაციას გამოეყენებინა ეს სასამართლო გადაწყვეტილება იმისათვის, რომ შეეწყვიტა ჩემთვის სადეპუტატო უფლება-მოსილება.
ეს გადაწყვეტილება ჩვენ ვერ გაგვტეხს. პირდაპირ გეტყვით, რომ პირიქით – ეს ზრდის ჩვენს მოტივაციას იმისათვის, რომ ვიბრძოლოთ სახელმწიფოს განსათავისუფლებლად მიმტაცებელთა ხელიდან.
ჩვენ, ,,ლელო საქართველოსთვის“ ჩვენს ვალდებულებას თანამოქალაქეებთან შევასრულებთ, გავაგრძელებთ მათ ვალდებულების შესრულებას მშვიდად, შემართებით და გადავდგამთ იმ პოლიტიკურ ნაბიჯებს, რომელიც მიზანშეწონილად მიგვაჩნია ამ ვითარებაში“, – განაცხადა ბადრი ჯაფარიძემ
