ჰუმანიტარულ მეცნიერებათა დოქტორი, პარტია “სტრატეგია აღმაშენებლის” პოლიტიკური საბჭოს წევრი, ნანა ტოხვაძე შეფასებებს აკეთებს კერძო საგანმანათლებლო დაწესებულებებში დასაქმებულებთან დაკავშირებით და მიზანშეწონილად მიაჩნია, რომ ამ კატეგორიის ადამიანებსაც გაეწიოთ შეღავათი მუნიციპალური ტრანსპორტით მგზავრობის ხარჯებზე:
“მძიმე სოციალური ფონი, გაძვირებული ფასები, ინფლაცია და საყოველთაო უმუშევრობით გამოწვეული დაბალი შემოსავლები ისეთივე ტვირთად დააწვათ კერძო საგანმანათლებლო დაწესებულებებში დასაქმებულებს, როგორც თითოეულ ჩვენგანს.
საინტერესოა, ასეთი რა შემოსავალი ეგულებათ კერძო სკოლის მასწავლებლების ოჯახებში, რომ სატრანსპორტო ტარიფებზე საშეღავათო კატეგორიების ჩამონათვალში ვერ მოხვდნენ?! ხშირ შემთხვევაში, დაბალბიუჯეტიანი კერძო სკოლების მასწავლებელთა ხელფასი არაფრით განსხვადება საჯარო სკოლის მასწავლებლის ანაზღაურებისგან. რაც შეეხება სამუშაო დატვირთვას და დაკისრებულ მოვალეობას, ისინიც ხომ იმავე მონდომებითა და კეთილსინდისიერებით ემსახურებიან ჩვენს მომავალ თაობას? მაშ, რით აიხსნება ეს დისკრიმინაციული მიდგომა?
რატომ ჩათვალა ქ. თბილისის მერიამ, რომ კერძო სკოლაში დასაქმებული მასწავლებები არ იმსახურებენ ამ შეღავათს?!
სწორედ ამ უთანასწორობის აღმოსაფხვრელად შეიქმნა პეტიცია, რომლის შინაარსსა და მოთხოვნას ასეულობით პედაგოგი უკვე შემოუერთდა. იმედი მაქვს საერთო ძალისხმევითა და აქტიურობით მივაღწევთ შედეგს. ცხადია, მსგავსი მოთხოვნით უნდა მივმართოთ სხვა ქალაქების მერიებს და შევეცადოთ, მცირედით მაინც შევუმსუბუქოთ მასწავლებლებს ყოფა-ცხოვრება,” – აცხადებს ნანა ტოხვაძე.
ინფორმაციისთვის – კერძო საგანმანათლებლო დაწესებულებაში დასაქმებული პირებისთვისაც მუნიციპალურ ტრანსპორტზე საშეღავათო ტარიფით სარგებლობის მოთხოვნისთვის პეტიცია მოამზადა:
ტრანსპორტის ტარიფზე შეღავათით ისარგებლონ კერძო სკოლის მასწავლებლებმაც
