,,ლეიბორისტული პარტიის“ თავმდომარე შალვა ნათელაშვილმა პარტიის პოლიტიკური გადაწყვეტილების შესახებ გააკეთა განცხადება, რომლის თანახმადაც იგი პარლამენტში შედის:
,,პარტიის პოლიტიკურმა კომიტეტმა მიიღო გადაწყვეტილება ,,ლეიბორისტული პარტიის“ პარლამენტში შესვლაზე. დღეს ეს იყო ერთადერთი სწორი სტრატეგია რათა ჩვენ დავიწყოთ რეჟიმის ჩამოშლა, გავაგრძელოთ, გავაძლიეროთ – მათ შორის, საპარლამენტო ბერკეტების გამოყენებით.
მას შემდეგ, რაც საყოველთაო ბოიკოტი არ გამოვიდა, მას შემდეგ, რაც სოციოლოგიური გამოკითხვებით, მოსახლეობის აბსოლუტურმა უმრავლესობამ მოითხოვა ,,ლეიბორისტული პარტიის“ პარლამენტში დაბრუნება, ჩვენ ვალდებული ვართ გავითვალისწინოთ ეს რეალიები და მოთხოვნები, ხალხის, ქვეყნის საჭიროება, ტკივილი და მზად ვართ შევეჭიდოთ იმ ფრონტს, რასაც ჰქვია ანტისახალხო კოალიცია საპარლამენტო უმრავლესობის სახით.
რაც შეეხება მანდატის შეწყვეტას, მე ვთხოვ რეჟიმის მეთაურს, კარგად გაიხსენოს ,,თაგვმა თხარა, თხარაო და კატა გამოთხრაო“. აი ამ მანდატის შეწყვეტას არ მოჰყვეს მისთვის ისეთი რამის გამოთხრა, რის შემდეგაც ის საბოლოოდ დაემშვიდობება ყველაფერს, რაც მოპოვებული აქვს“, – განაცხადა შალვა ნათელაშვილმა.
ავტორი
ნინი ხიჯაკაძე
