“სვანეთი, კურორტი თეთნულდი “ფრირაიდის“ მსოფლიო ტურის საკვალიფიკაციო შეჯიბრებას მასპინძლობს” – ტურიზმის ეროვნული ადმინისტრაცია

ტურიზმის ეროვნული ადმინისტრაცია ინფორმაციას ავრცელებს იმასთან დაკავშირებით, რომ სვანეთი, კურორტი თეთნულდი “ფრირაიდის“ მსოფლიო ტურის საკვალიფიკაციო შეჯიბრებას მასპინძლობს. საკვალიფიკაციო ეტაპში 120-მდე სპორტსმენი მონაწილეობს საქართველოდან და მსოფლიოს 20 ქვეყნიდან. მათ შორის: საფრანგეთიდან, გერმანიიდან, შვედეთიდან, შვეიცარიიდან, დიდი ბრიტანეთიდან, პოლონეთიდან, ახალი ზელანდიიდან და სხვა.

ფრირაიდზე მონაწილეობს სამი სპორტსმენ-ინფლუენსერი საფრანგეთიდან. ისინი საქართველოს სამთო-სათხილამურო კურორტს ტურიზმის ეროვნული ადმინისტრაციის ორგანიზებით ეწვივნენ. სპორტსმენ-ინფლუენსერები სპორტული აქტივობების გარდა, კურორტ თეთნულდზე გადაიღებენ ფოტო-ვიდეო მასალას, რომელსაც საკუთარი სოციალური ქსელების საშუალებით, ათიათასობით ადამიანს გაუზიარებენ.

ღონისძიების მაღალი სტანდარტით ჩატარება წარმოაჩენს საქართველოს სამთო-სათხილამურო კურორტების პოტენციალს საერთაშორისო მასშტაბით, გაზრდის საქართველოს სამთო-სათხილამურო კურორტების ცნობადობას და უფრო მიმზიდველს გახდის ადგილობრივი და უცხოელი დამსვენებლებისა და ინვესტორებისთვის. აღნიშნული კი, ხელს შეუწყობს საქართველოში ტურიზმის განვითარებასა და შესაბამისი საინვესტიციო გარემოს შექმნას.