საპარლამენტო ფრაქცია “ქართული ოცნების” თავმჯდომარე მამუკა მდინარაძემ, პარლამენტში გამართულ ბრიფინგზე, მმართველი პარტიის მიერ მომზადებული უკრაინის მხარდამჭერი რეზოლუციის ვარიანტი წარადგინა/წაიკითხა:
“საქართველოს პარლამენტი, გამოხატავს ღრმა შეშფოთებას უკრაინაში შესაძლო სამხედრო ესკალაციის გამო და გმობს ყოველგვარ განზრახვას, რომელიც სუვერენული სახელმწიფოს სუვერენიტეტის და ტერიტორიული მთლიანობის წინააღმდეგ შეიძლება იყოს მიმართული, რაც ახალ საფრთხეს უქმნის არა მხოლოდ უკრაინის, არამედ რეგიონულ მშვიდობას და უსაფრთხოებას;
აცხადებს, რომ ჩრდილო ატლანტიკურ ალიანსში გაწევრიანება არის სახელმწიფოს სუვერენული უფლება და, სამხედრო პოლიტიკური არგუმენტებით, ამ უფლების შეზღუდვის ყოველგვარი მცდელობა კატეგორიულად მიუღებელია;
მიიჩნევს, რომ უკრაინაში ომის არდაშვება უნდა იყოს საერთაშორისო თანამეგობრობის უმთავრესი საზრუნავი;
სოლიდარობას უცხადებს მეგობარ უკრაინელ ხალხს, რომელსაც ყოველგვარი შესაძლო სამხედრო ესკლაციით, მძიმე ზიანი შეიძლება მიადგეს.
ყოველივე ზემოთაღნიშნულიდან გამომდინარე და გათვალისწინებით, საქართველოს პარლამენტი მოუწოდებს საქართველოს მთავრობას, დიპლომატიური ინსტრუმენტების გამოყენებით და სტრატეგიულ პარტნიორებთან მჭიდრო კოორდინაციით, განაგრძოს თავისი წვლილის შეტანა უკრაინაში ომის არდაშვებაში,” – ნათქვამია “ქართული ოცნების” მიერ მომზადებულ რეზოლუციის ტექსტში.
მმართველი პარტიის ერთ-ერთმა ლიდერმა, რეზოლუციის ტექსტთან დაკავშირებით, კონკრეტული განმარტებებიც გააკეთა:
“რეზოლუციის ტექსტი, რომელსაც, საბოლოო ჯამში, საქართველოს პარლამენტი მიიღებს, დაცლილია ყოველგვარი პოპულისტური თუ პროვოკაციული რიტორიკისგან, ამის დრო აქ ნამდვილად არ არის“, – განმარტა მამუკა მდინარაძემ.
