“მოვუწოდებ პენიტენციურ სამსახურს, შეწყვიტოს არაადეკვატური სამედიცინო მომსახურება და თვითნებურად რაღაც მედიკამენტების მიცემა” – მარიამ ჯიშკარიანი მიხეილ სააკაშვილის მკურნალობასთან დაკავშირებით

ცენტრ „ემპათიის“ ხელმძღვანელი მარიამ ჯიშკარიანი საქართველოს მე-3 პრეზიდენტის ადვოკატებს მიმართავს, რომ სასამართლოსგან მოითხოვონ მიხეილ სააკაშვილის სასჯელის გადავადება, რადგან წინააღმდეგ შემთხვევაში შეიძლება მისი ჯანმრთელობის მდგომარეობა დამძიმდეს:

,,მოვუწოდებ პენიტენციურ სამსახურს, შეწყვიტოს არაადეკვატური სამედიცინო მომსახურება და თვითნებურად რაღაც მედიკამენტების მიცემა. ვინაიდან ნეიროლეფსიური პრეპარატები იმ თავის ტვინის ორგანულ დაზიანებაზე, რომელიც მას აქვს ანუ ენცეფალოპათიაზე ვერნიკეს და პოლინეიროპათიაზე, რეკომენდირებული არ არის ანტიფსიქოზური პრეპარატების მიცემა. ამის საჭიროებას ჩვენ იქ ვერ ვხედავთ.

შესაბამისად, მისცეს საშუალება ცენტრ ,,ემპათიას“ კვალიფიციურ ექსპერტებს შევიდნენ, შეაფასონ მდგომარეობა და გასცენ რეკომენდაციები. ვინაიდან ვერ ახორციელებენ ადეკვატურ მკურნალობას ვერცერთი მიმართულებით – იქნება ეს ფარმაკოთერაპიული მკურნალობა თუ სხვა ნეიროფსიქოლოგიური რეაბილიტაცია.

ჩვენ ვფიქრობთ და ადვოკატებს მივმართავთ ცენტრი ,,ემპათია“, რომ სასჯელის გადავადებაზე შეიტანონ სასამართლოში სარჩელი და მოითხოვონ სასჯელის გადავადება. წინააღმდეგ შემთხვევაში, სააკაშვილის ჯანმრთელობის მდგომარეობა შეიძლება დამძიმდეს“, – განაცხადა მარიამ ჯიშკარიანმა.

ავტორი
ნინი ხიჯაკაძე