“არანაირი წვდომა არ გვაქვს ინფორმაციაზე, თუ ვინ ზრუნავს მიხეილ სააკაშვილის ჯანმრთელობაზე, რა ნაბიჯები იდგმება ამ მიმართულებით” – დიმიტრი საძაგლიშვილი

1481

საქართველოს მე-3 პრეზიდენტის ადვოკატი დიმიტრი საძაგლიშვილი მწვავე კომენტარს აკეთებს №12 დაწესებულებაში მიმდინარე პროცესზე. მისი განცხადებით, მიხეილ სააკაშვილთან დღემდე უკანონოდ არ უშვენებ მკურნალ ექიმს და ასევე ადვოკატებს არ ეძლევათ პატიმართან პერსონალურად, დახურული ფორმის კომუნიკაციის საშუალება:

,,დღემდე უკანონოდ არ უშვებენ მიხეილ სააკაშვილთან მის მკურნალ ექიმს და ეს იმ პირობებში, როდესაც მას აქვს ჯანმრთელობასთან დაკავშირებული პრობლემები. ბუნებრივია, რომ ეს მიხეილ სააკაშვილის ფუნდამენტური უფლებების ძალიან მნიშვნელოვანი და არსებითი დარღვევაა.

არანაირი წვდომა არ გვაქვს ჩვენ ინფორმაციაზე, თუ ვინ ზრუნავს მიხეილ სააკაშვილის ჯანმრთელობაზე და რა ნაბიჯები იდგმება ამ მიმართულებით. ამ ფონზე მიხეილ სააკაშვილის პირადი ექიმის არდაშვება მასთან ძალიან ბევრ კითხვის ნიშანს აჩენს, რაც კიდევ ერთხელ ააშაკარავებს იმას, რომ საქართველოს ხელისუფლების და იუსტიციის სამინისტროს მიზანი ნამდვილად არ არის მიხეილ სააკაშვილის ჯანმრთელობაზე ზრუნვა, მისთვის იმ სამედიცინო სერვისების გაწევა, რაც აუცილებელია და ეს აუცილებლობა დადასტურებულია 2 კონსილიუმის დასკვნებით!

ასევე, ადვოკატებს არ გვაძლევენ მასთან პერსონალურად, დახურული ფორმის, კომუნიკაციის საშუალებას, რაზეც არაერთხელ გავაკეთეთ განცხადება და მოვითხოვეთ, რომ ეს შეზღუდვები მოხსნილიყო. თუმცა, დღემდე №12 დაწესებულება და მისი დირექტორი არაფერს არ აკეთებს, რომ ეს უკანონო ბარიერი, რაც ჩვენსა და მიხეილ სააკაშვილს შორის არის აღმართული, ყოფილიყო გაუქმებული.

ჩვენ ბუნებრივია, მოვითხოვთ საჯაროდ, კიდევ ერთხელ, რომ მოგვეცეს შესალებლობა კანონით დადგენილი წესით მიხეილ სააკაშვილთან კომუნიკაციის და ამ პროცესში დახმარებას ვთხოვთ საქართველოს ადვოკატთა ასოციაციას, სახალხო დამცველს, ნებისმიერ დაწესებულებას, რომელსაც აქვს შესაძლებლობა, რომ რაიმე გავლენა მოახდინოს ამ დაცვის დაცვის უფლების რეალიზებაზე“, – განაცხადა დიმიტრი საძაგლიშვილმა.

ავტორი
ნინი ხიჯაკაძე

კომენტარები პუბლიკაციაზე