,,სტრატეგია აღმაშენებლის“ გენერალურმა მდივანმა პაატა მანჯგალაძემ პარლამენტში “მინისტრის საათის” ფორმატში მოსულ ეკონომიკის მინისტრს, ნათია თურნავას კონკრეტული შეკითხვებით მიმართა:
,,თქვენ თითქმის ერთი საათი ისაუბრეთ იმ წარმატებაზე, რასაც სამინისტრომ და ქვეყანამ მიაღწია. მე მართლა არ ვარ ჩასაფრებულის მდგომარეობაში და მიხარია ჩემი ქვეყნის თითოეული წარმატება. მაგრამ, თუ ეს ყველაფერი ნამდვილად ასეა, რასაც თქვენ საუბრობთ და მადლობებს ვისმენდით ,,ქართული ოცნების“ წარმომადგენლებისგან, მაშინ:
- რატომ ხდება, რომ ბოლო წლებში, სტატისტიკის მიხედვით, ქვეყანას ტოვებს საშუალოდ 60-70 ათასი შრომისუნარიანი ადამიანი?!
- რატომ ხდება ქალბატონო მინისტრო ის, რომ გაზრდილია საგარეო ვალი და თითქმის 30 მლრდ-ს გადაცდა, რაც დაახლოებით 60%-ია ჩვენი მშპ-ის?!
- რატომ ხდება, რომ სამუშაო ადგილები თურმე შევქმენით მხოლოდ 0.7 %, ანუ ეს არის დამსახურება?!
სტატისტიკის ეროვნული სამსახურის მონაცემებით, აბსოლუტურ სიღარიბეში მცხოვრები ადამიანების რაოდენობა თითქმის 20%-ს გადაცდა. ეს ნიშნავს იმას, რომ ამ ადამიანს უჭირს ბრძოლა ყოველდღიური ლუკმა-პურისთვის. ფასები პურზე გაზრდილია 50%-ით, შაქარი 34%-ით. როცა საერთაშორისო ფაქტორი ვერ იქნება სწორი პურსა თუ ზეთთან დაკავშირებით, რადგან საერთაშორისო ბაზარზე არ არის ამხელა მატება. რით არის ეს ყველაფერი გამოწვეული?
რა შეეხება საწვავის ფასს – პლაცზე და ბირჟაზე დაკლებულია, მაგრამ საქართველოში ღირებულება დაახლოებით 30%-ით გაზრდილია.
ასევე, არის ინფლაციის ძალიან მაღალი მაჩვენებელი, რაზეც ისაუბრა ეროვნული ბანკის პრეზიდენტმაც და ,,ქართული ოცნების“ ვერცერთი წარმოამდგენელი ამ ინფლაციაში ვერ ხედავს მთავრობის და თავის პასუხისმგებლობას, რაც ნამდვილად სამწუხაროა!
გაზრდილია სესხებზე პროცენტი 14%-ით. შემცირებულია პირდაპირ უცხოური ინვესტიციები.
მე მაქვს შეკითხვები: ბევრი ისაუბრეთ მიღწევაზე, მაგრამ გამოწვევები, რაც არის ამასთან დაკავშირებით, თუ ხედავთ საკუთარ და სამინისტროს პასუხისმგებლობას? თუ შეგიძლიათ იყოთ თვითკრიტიკული? რა უნდა მოხდეს ისეთი, რა სტატისტიკა უნდა გაუარესდეს კიდევ ქვეყანაში, რომ თქვენ და მთავრობის სრულმა შემადგენლობამ იფიქროს გადადგომაზე?!“, – განაცხადა პაატა მანჯგალაძემ.
ავტორი
ნინი ხიჯაკაძე
