“ერთადერთი, რაც შემიძლია გითხრათ არის ის, რომ ყველა სპეციალისტმა თავისი მიმართულებით ძალიან დეტალურად შეისწავლა პაციენტის საქმე” – ნინო ლომჯარია

სახალხო დამცველი ნინო ლომჯარია გორის ჰოსპიტალში მიხეილ სააკაშვილთან შეხვედრის შემდეგ მედიასთან განმარტებებს აკეთებს და აღნიშნავს, რომ პაციენტის მდგომარეობა შეისწავლა ყველა სპეციალისტმა და ყველა გამოკვლების შეჯამების შემდეგ გაკეთდება საბოლოო დასკვნა:

,,ერთადერთი, რაც შემიძლია გითხრათ არის ის, რომ ყველა სპეციალისტმა თავისი მიმართულებით პაციენტის საქმე ძალიან დეტალურად შეისწავლა.

ასევე, ჩატარდა მისი უშუალო გასინჯვა, შესაბამისი სპეციალისტების მიერ. პარალელურად მიმდინარეობდა მის მკურნალ ექიმთან და სამედიცინო პერსონალთან გასაუბრება.

მივიღეთ ინფორმაციები, ყველას აქვს საკუთარი მიმართულებით, ესე ვთქვათ, საკუთარი ინფორმაცია, რომელსაც სჭირდება შეჯერება, რადგან ეს არ არის პაციენტი, რომელსაც ერთი რომელიმე კონკრეტული პრობლემა აქვს, არის მრავალმხრივი ეს გართულებები და ახლა ექიმებს სჭირდებათ შეაჯერონ ეს ინფორმაციები. ამის შემდეგ, ბუნებრივია, საჯაროდ გავრცელდება დასკვნა თავისი რეკომენდაციებით, თავისი შეფასებებით”, – განაცხადა ნინო ლომჯარიამ.

ავტორი
ნინი ხიჯაკაძე