“სულ რამდენიმე დღეა საჭირო და გავიგებთ, მორიგი უშინაარსო და უმომავლო ტექსტია თუ რამე კეთილგონიერს ისახავს მიზნად” – ნიკა გვარამია სალომე ზურაბიშვილის პოზიციაზე

დემოკრატიის ვირტუალური სამიტზე საქართველოს პრეზიდენტ სალომე ზურაბიშვილის სიტყვით გამოსვლას და საქართველოში მიმდინარე პროცესებთან დაკავშირებით გამოთქმულ მოსაზრებებს ეხმაურება ტელეკომპანია “მთავარი არხის” გენერალური დირექტორი, ნიკა გვარამია:

“მაქვს უფლება, არ მჯეროდეს.

მაქვს გამოცდილება, არ ვენდობოდე.

არც მჯერა და არც ვენდობი.

თუმცა, მაქვს საკმარისი საღი აზრი, რომ არც სიხარულის ყიჟინა შემოვკრა და არც ფურთხის ნიაღვარი მივუშვა.

დაველოდები და დავაკვირდები, რას/ვის გულისხმობს ზურაბიშვილი “ინკლუზიურობაში”, “მთელ საზოგადოებაში”, “უახლოესი ისტორიის საერთო აღქმაში”, “ტკივილში” და მისი დაძლევის ფორმებსა და ტემპებში და, რაც მთავარია, საითკენაა მისთვის მიმართულება “წინ”.

სალომე ზურაბიშვილი: “როგორც საქართველოს პრეზიდენტი, პირობას ვდებ, რომ წამოვიწყებ ინკლუზიურ პროცესს, საუბარს ეროვნული მასშტაბით, რომელშიც ჩაბმული იქნება მთელი საზოგადოება, რათა მივაღწიოთ უახლესი ისტორიის საერთო აღქმას, დავძლიოთ ტკივილი და წინ წავიდეთ”.

სულ რამდენიმე დღეა საჭირო და გავიგებთ, მორიგი უშინაარსო და უმომავლო ტექსტია თუ რამე კეთილგონიერს ისახავს მიზნად აქ და ახლა“, – წერს ფეისბუქის პირად გვერდზე ნიკა გვარამია.