,,ერთიანი ნაციონალური მოძრაობის“ პოლიტიკური საბჭოს წევრმა ლევან ხაბეიშვილმა პარტიის ოფისში გამართულ ბრიფინგზე შეფასებები გააკეთა მიხეილ სააკაშვილის სასამართლო პროცესის პარალელურად მიმდინარე საპროტესტო აქციასთან დაკავშირებით, სადაც, მისი თქმით, პოლიცია ასრულებდა პოლიტიკურ დავალებებს და იცავდა რუსი ოლიგარქის ინტერესებს:
,,გუშინ კიდევ ერთხელ ვიხილეთ, თუ როგორ გადააქციეს პოლიცია პოლიტიკური დავალების შემსრულებლად. პოლიცია არ იცავს მოქალაქეს, კანონს. ისინი ასრულებენ პოლიტიკურ დავალებებს და რა თქმა უნდა, ისინი იცავენ რუსი ოლიგარქის ინტერესებს.
ჩვენ გუშინ ვიხილეთ, როგორ გაუსწორდნენ ფიზიკურად მშვიდობიან მანიფესტანტებს და აგრესიულად ექცეოდნენ ჟურნალისტებს – მათ შორის ოპერატორებს. ხელითაც შეეხნენ ოპერატორს, რომლის ჯანმრთელობას ნამდვილად დაემუქრა საფრთხე, როდესაც მას, ფაქტიურად, ეცა რამდენიმე პოლიციელი.
ჩვენ, ასევე, ვიხილეთ სასამართლოს ეზოს წინ განლაგებულ პოლიციელთა, ფაქტობრივად არმია, რომელიც კანონის დარღვევით არ აძლევდა მოქალაქეებს შესაძლებლობას, რომ ყოფილიყვნენ სასამართლოს ეზოში.
მიუხედავად ამისა, მოქალაქეებს არანაირი პროტესტი, ამის გამო, არ გამოუთქვამთ. ამის შემდეგ უკვე დაიწყო სპეცრაზმელების პროვოკაცია და ხაზს ვუსვამ, რომ ესენი იყვნენ არა საპატრულო პოლიციის თანამშრომლები, არამედ პოლიციის ფორმაში გადაცმული განსაკუთრებულ დავალებათა დეპარტამენტის ე.წ. რობოკოპები, სპეცრაზმელების წარმომადგენლები. იმისთვის, რომ ისინი თავისი ფორმებით დაეყენებინათ ეს თავშივე ნიშნავდა იმას, რომ არაპროპორციულ ძალას იყენებდნენ, რაც გააკეთეს კიდეც – მხოლოდ პოლიციის ფორმაში გადაცმულებმა, რომელთაც ჰქონდათ ე.წ. ნინძა ნიღბები, რომელიც საპატრულო პოლიციას არ აქვს და ჰქონდა წიწაკის “სპრეი”, რომელიც ასევე არ აქვს საპატრულო პოლიციას და მას უმისამართოდ ასხამდნენ ადამიანებს. რამდენიმე ადამიანი დაშავდა და შეექმნათ ჯანმრთელობის პრობლემა, რის სემდეგადაც აქციის მონაწილეებს მოუწიათ გზაზე გადასვლა და გადაკეტვა“, – განაცხადა ლევან ხაბეიშვილმა.
ავტორი
ნინი ხიჯაკაძე
