პოლიტიკური პლატფორმა “სტრატეგია აღმაშენებლის” თავმჯდომარე, გიორგი ვაშაძე პარლამენტის სესიაზე სიტყვით გამოსვლისას ქვეყანაში შექმნილ უმძიმეს პოლიტიკურ ვითარებაზე საუბრობს და ყურადღებას პოლარიზაციაზე, ურთიერთდაპირისპირებაზე, ზიზღის ენაზე ამახვილებს. ოპოზიციონერი ლიდერი საკრებულოებში შექმნილ სიტუაციასაც ეხმაურება და ხელისუფლების დამოკიდებულებას აკრიტიკებს:
“ქვეყანაში დღეს გვაქვს უმძიმესი პოლიტიკური ვითარება, პოლარიზაცია, ურთიერთდაპირისპირება, ზიზღის ენა, რიტორიკა, თავდასხმები, უწესობის წესად ქცევა და კანონის ყოველთვის პოლიტიკური მიზნებისთვის გამოყენება.
ბატონი კობახიძე სიტყვით გამოვიდა და გვითხრა, რომ დღის წესრიგია შესაცვლელი, დეპოლარიზაციაზე საუბრობდა. თუმცა ეს იყო მისი გამოსვლის მხოლოდ ერთი ფრაზა, გამოსვლის 99% იყო ისევ სიძულვილის ენა, დაპირისპირების წახალისება, იმ პოლარიზების მაქსიმალურად ხელშეწყობა, რომელზეც თვითონაც ამბობს, რომ ანგრევს ქვეყანას.
რა ნაბიჯები გადადგა არჩევნების შემდეგ “ქართულმა ოცნებამ” ქვეყანაში?! იყო ეს, რომ დამშვიდებულიყო სიტუაცია თუ პირიქით არეულიყო?
დავიწყოთ საკრებულოების უახლესი თემით.
მეგობრებო, ოპოზიციამ ხომ აიღო უმრავლესობა იმ საკრებულოში?! თქვენ განა იმას სწუხართ, რომ ხალხისთვის სასიკეთო ბიუჯეტი სწრაფად უნდა დამტკიცებულიყო, უბრალოდ ელემენტარული ძალაუფლების და პასუხისმგებლობის განაწილება არ გინდათ. პასუხისმგებლიანი ხელისუფლება თქვენს ადგილზე იტყოდა – თუ შენ იმ საკრებულოში მხარი დაგიჭირა მოსახლეობამ, მაშინ იტვირთე პასუხისმგებლობა იმ ქალაქის განვითარებაზე და ბიუჯეტის დამტკიცებაზეც,” – აცხადებს გიორგი ვაშაძე.
ინფორმაციას პოლიტიკური პლატფორმა “გიორგი ვაშაძე – სტრატეგია აღმაშენებლის” მედიასთან და საზოგადოებასთან ურთიერთობის სამსახური ავრცელებს
