“მიხეილ სააკაშვილის სასამართლოში არმოყვანის სამართლებრივი საფუძველი არ არსებობს” – ბექა ბასილაია

მიხეილ სააკაშვილის ადვოკატმა ბექა ბასილაიამ კომენტარი გააკეთა საქართველოს მე-3 პრეზიდენტის სასამართლო პროცესზე დასწრებასთან დაკავშირებით, რომელიც 29 ნოემბერს გაიმართება. მისი თქმით, სამართლებრივად არანაირი საფუძველი არ არსებობს იმისა, რომ მიხეილ სააკაშვილი არ მიიყვანონ სასამართლოს შენობაში:

,,ვხედავდით მთელი თვე ნახევრის მანძილზე სასამართლო პროცესებს როგორ არ ნიშნავდნენ, მიხეილ სააკაშვილის საზოგადოების წინაშე გამოჩენის შიშით. ჩვენ ვნახეთ როგორ არ მოიყვანეს სასამართლო პროცესებზე.

ჩვენ ვხედავთ იუსტიციის სამინისტროს განცხადებებს სრულიად ფანტასმაგორიულს, რომ თითქოს და რაღაც მანქანებს გზა უნდა ჩაეხერგათ და ა.შ.

შესაბამისად, ხვალინდელ პროცესზე ვარაუდი იმისა, რომ მიხეილ სააკაშვილს გადმოიყვანენ – ვერაფერს ვერ დაემყარება, იქიდან გამომდინარე, რომ ხელისუფლება კვლავ პოლიტიკური მიზანშეწონილებით მიიღებს გადაწყვეტილებას.

თუმცა, მიხეილ სააკაშვილის სასამართლოში არმოყვანის სამართლებრივი საფუძველი არ არსებობს“, – განაცხადა ბექა ბასილაიამ.

ავტორი
ნინი ხიჯაკაძე