“ახლა დგება მთავარი საკითხი – მიხეილ სააკაშვილის განთავისუფლების საკითხი” – ეკა ხერხეულიძე

,,ერთიანი ნაციონალური მოძრაობის“ პოლიტსაბჭოს წევრმა ეკა ხერხეულიძემ საქართველოს მე-3 პრეზიდენტი, მიხეილ სააკაშვილი გორის სამხედრო ჰოსპიტალში მოინახულა. როგორც ჟურნალისტებთან ინტერვიუს დროს ოპოზიციონერი ლიდერი აღნიშნავს, საუბრის მთავარი განსახილველი თემა იყო ქვეყანაში მიმდინარე პროცესები:

,,მიხეილ სააკაშვილი გადის ახლა მკურნალობას, კვლევებს. ეს არ არის სრულყოფილი სერვისი. ყველამ ვიცით, მისი მდგომარეობიდან გამომდინარე, იგი საჭიროებს კვალიფიციურ და ფუნდამენტურ კვლევას.

მიხეილ სააკაშვილის საავადმყოფოში გადმოყვანა ეს არ არის ის გზა, რაც მისი ქვეყანაში შემოსვლისას იყო გაცხადებული. მოგეხსენებათ, მისი სურვილია პოლიტიკურ საქმიანობაში სრულფასოვანი ჩართვა. მას არ აქვს არანაირი შესაძლებლობა სასამართლოებზე მიმართოს ხალხს, არ აქვს შესაძლებლობა პირდაპირი ურთიერთობა ჰქონდეს საკუთარ ხალხთან.

ახლა დგება მთავარი საკითხი – მისი განთავისუფლების საკითხი.

ამ საკითხებთან დაკავშრებით ვისაუბრეთ და, რა თქმა უნდა, იმ გეგმებთან, რომელიც ქვეყანაში მიმდინარე პროცესებს ეხება“, – განაცხადა ეკა ხერხეულიძემ

შეგახსენებთ, რომ საქართველოს მე-3 პრეზიდენტი, მიხეილ სააკაშვილი მკურნალობას გადის გორის სამხედრო ჰოსპიტალში. მას შემდეგ, რაც გლდანის მე-18 დაწესებულებიდან ჰოსპიტალში გადაიყვანეს,  შიმშილობა შეწყვიტა.

ავტორი
ნინი ხიჯაკაძე