20 დეკემბერს „ალტ-ინფომ“ პარტია „კონსერვატიული მოძრაობა“ დააფუძნა. პარტიის თავმჯდომარედ ზურაბ მახარაძე დასახელდა, გენერალური მდივნის პოზიციაზე კი გიორგი ქარდავა წარადგინეს.
პარტიის მიზანს კონსერვატიული იდეების გავრცელება და პოპულარიზაცია წარმოადგენს.
„ჩვენ არ გაგვიკეთებია გათვლა ცნობად სახეებზე, ადამიანებზე, რომლებიც ყველგან, ყველა კონფიგურაციით იყვნენ და ყველაფერი სცადეს. ამ პარტიას ვაფუძნებთ თქვენი იმედით, ჩვენი მეგობრების, ახლობლების, იდეური თანამებრძოლების იმედით. „კონსერვატიული მოძრაობა“ იქნება მართლაც ხალხის პარტია, იქნება ხალხის ხმა, იქნება გამონაკლისი, რომელიც საკუთარ პოლიტიკურ მომავალს დაუკავშირებს არა რომელიმე გარე ქვეყნის საელჩოდან წამოსულ დირექტივებს, არამედ ქართველი ერის ნებას. „კონსერვატიული მოძრაობა“ იდგება თქვენს მხრებზე,“ – განაცხადა ზურაბ მახარაძემ პარტიის ყრილობაზე.
ჟურნალისტებთან შეხვედრისას პარტიის თავმჯდომარემ გეგმებისა და ამოცანების თაობაზე ისაუბრა:
“მთავარი და ძირითადი ამოცანა არის, შეიქმნას კონსერვატიული ძალა, რომელიც წარმოადგენს საქართველოს მოსახლეობის უდიდესი ნაწილის ინტერესებს.
ჩვენი ამოცანა არის დავამყაროთ ქრისტიანული დემოკრატია. რას ვგულისხმობთ ამაში – პრინციპები, რომლის მიხედვითაც ამ ქვეყანაში უნდა დარეგულირდეს, კანონების სივრცე უნდა იყოს ქრისტიანული მორალიდან და ჩვენი კულტურიდან გამომდინარე.
პირველივე საარჩევნო პროცესში ვიქნებით აქტიურად ჩართულები“, – განაცხადა ზურაბ მახარაძემ.
