“ჩვენ უნდა ვიყოთ ძალიან თანმიმდევრულები, ფრთხილები, როცა არის დიდი მღელვარება საზოგადოებრივი, როცა ადამიანის სიცოცხლე არის სასწორზე“ – ელენე ხოშტარია

პარტია ,,დროას“ ლიდერმა ელენე ხოშტარიამ მიიღო გადაწყვეტილება შიმშილობის შეწყვეტის თაობაზე, რისი წინაპირობაც გახდა საქართველოს მე-3 პრეზიდენტის გორის სამხედრო ჰოსპიტალში გადაყვანის გადაწყვეტილება. ოპოზიციონერი ლიდერის თქმით, მნიშვნელოვანია თანმიმდევრულობა და სიფრთხილე არსებულ პოლიტიკურ ვითარებაში:

,,ჩემი ამ რადიკალური ზომის – შიმშილობისა, აბსოლუტურად ყველა ეტაპზე, ჩემი პოზიცია იყო ძალიან გამჭვირვალე. ჩემი მთავარი მოთხოვნა არის მიხეილ სააკაშვილის სიცოცხლის, ჯანმრთელობის, ღირსების უზრუნველყოფა. სამწუხაროდ, გუშინ ჩვენ მივედით იმ მძიმე ვითარებამდე, როდესაც მის სიცოცხლეს მიადგა დიდი დარტყმა. ჩვენ დროულად არ მოვისმინეთ პროფესიონალი ექიმების პოზიცია და აღმოვჩნდით ძალიან მძიმე ვითარებაში.

მე, რა თქმა უნდა, შიმშლობის დაწყებამდე მქონდა კონსულტაციები, თუ რა შეიძლებოდა ყოფილიყო გამოსავალი ამ ვითარებიდან. ეს ჩემი პოზიცია იყო დაფუძნებული – ექსპერტებთან, ჩემ კოლეგებთან საუბარზე.

გორის კლინიკაში უსაფრთხოდ გადაყვანა არის ამ ვითარებაში გამოსავალი მიხეილ სააკაშვილის უსაფრთხოების და ჯანმრთელობის თვალსაზრისით – მკურნალობის. ამიტომ ეს არის საფუძველი ჩემი შიმშილობის შეწყვეტის.

მე მიმაჩნია, რომ ჩვენ უნდა ვიყოთ ძალიან თანმიმდევრულები, ფრთხილები ამ ვითარებაში, როცა არის დიდი მღელვარება საზოგადოებრივი, როცა ადამიანის სიცოცხლე არის სასწორზე“, – განაცხადა ელენე ხოშტარიამ.

ავტორი
ნინი ხიჯაკაძე