პარტია ,,დროას“ ლიდერმა ელენე ხოშტარიამ მედიისა და საზოგადოებისათვის განმარტებები გააკეთა მის შიმშილობასთან დაკავშირებით, თუ კონკრეტულად რა მიზანს ემსახურება იგი. მისი თქმით, მზად არის ყველა კომუნიკაციაზე, რომელიც იქნება ორიენტირებული შედეგზე, რაც გულისხმობს ვითარების განმუხტვას:
,,მზად ვარ აბსოლუტურად ყველა კომუნიკაციისთვის, რომელიც, კატეგორიულად ხაზს ვუსვამ, – შედეგზე იქნება ორიენტირებული. შედეგი კი არის ვითარების განმუხტვა და არა უბრალოდ ვინმეს მოგება ან წაგება თუ კუნთების თამაში.
ამიტომ ჩემი კარი ღია არის ნებისმიერი ადამიანისთვის, ნებისმიერი პარტიიდან, პირველ რიგში – ,,ქართული ოცნებიდან“.
ძალიან დეტალურად ვესაუბრე ,,ქართული ოცნების“ წარმომადგენლებს, თუ რა არის ჩემი შიმშილობის მოტივაცია! რა არის ის პრინციპული სიმტკიცე, რომელსაც მე არ გადავუხვევ არცერთ შემთხვევაში.
ეს არ არის სიჯიუტე, ეს არის ის აუცილებელი ფასი, რომელიც უნდა გადავიხადოთ იმისთვის, რომ გამოვიდეთ ამ ჩიხური ვითარებიდან!“, – ელენე ხოშტარია
შეგახსენებთ, რომ ელენე ხოშტარიასთან დღეს იმყოფებოდნენ ,,ქართული ოცნება – დემოკრატიული საქართველოს“ ლიდერები: ირაკლი კობახიძე, მამუკა მდინარაძე და შალვა პაპუაშვილი. აღსანიშნავია, რომ დღეს პარტია ,,დროას“ ლიდერის შიმშლობის მე-15 დღეა.
ავტორი
ნინი ხიჯაკაძე
