,,სტრატეგია აღმაშენებლის” თავმჯდომარე გიორგი ვაშაძე ტელეკომპანია ,,პირველზე”, გადაცემაში ,,დღის ამბები”, პოლიტიკურ შეფასებას აკეთებს ქვეყანაში შექმნილ ვითარებასთან დაკავშირებით. ოპოზიციონერი ლიდერი აცხადებს, რომ მიუღებელია დანაშაულებრივი სიჯიუტე ,,ქართული ოცნების” მხრიდან, რადგან საქმე ეხება უკვე ადამიანების ჯანმრთელობის მდგომარებას:
,,ის, რაც ხდება ქვეყანაში ეს არის დანაშაულებრივი სიჯიუტე ,,ქართული ოცნების” მხრიდან. თითქოს ერთი მარტივი საკითხი, რომ სამოქალაქო-სამედიცინო დაწესებულებაში მიხეილ სააკაშვილის გადაყვანა თუ არ განმუხტვავდა, გარკვეულწილად მაინც დაიწყებოდა განმუხტვის პროცესი ამ სიტუაციაში – ელენე ხოშტარია არ იშიმშილებდა, სხვებიც არ იშიმშილებდნენ. მაგრამ მმართველი პარტია დანასაულებრივად ჯიუტობს და სურს რაღაც დაამტკიცოს. რას ამტკიცებს ეს მე ვერც გავიგე! ვის უმტკიცებს?! ქვეყანას, სახელმწიფოს?! მითუმეტეს ის უტიფარი განცხადებები, რომელიც მოვისმინეთ ჩვენ დასავლელ პარტნიორებზე უმრავლესობისა თუ ,, ქართული ოცნების” თავმჯდომარის მხრიდან.
მე მთავარ კითხვას ვსვამ: როდემდე შეიძლება ეს ყველაფერი გაგრძელდეს?! სამწუხაროდ, უნდა ვთქვა, რომ პროცესს ნამდვილად ამძიმებს თვითონ შიმშილობის ფაქტი – მიხეილ სააკაშვილის, რომლის ჯანმრთელობის მდგომარეობაზეც ნორმალური ინფორმაცია არ გვაქვს. აქვე უნდა აღვნიშნო, რომ როგორც საქართველოში, ისე ფარგლებს გარეთ იმედად ლამის ერთადერთი ინსტიტუცია დარჩა, სახალხო დამცველის, რომელიც ახლა ქმნის დამოუკიდებელ ექიმთა ჯგუფს და იგი მმართველი პარტიის პერსონალური თავდასხმების ობიექტი გახდა. ვინც არ ეთანხმება ,,ქართული ოცნების” მოსაზრებას, მათთვის ყველა არის ქვეყნის მტერი, ,,ნაც. მოძრაობა “, მიშისტი… დიდ უბედურებაში ვცხოვრობთ!
მე შეგახსენებთ, რომ ეს არის მე-3 და ალბათ, ყველაზე რთული პოლიტიკური კრიზისის ფაზა! გაგახსენებთ, პირველი იყო – საკონსტიტუციო ცვლილებების ჩაგდება 20 ივნისის შემდეგ და მას 8 მარტის შეთანხმება მოჰყვა, შემდგომი იყო გასული წლის, რომელსაც 19 აპრილის შეთანხმება მოჰყვა.
ეს 2 უმძიმესი პოლიტიკური ფაზა გვაჩვენებს რას, რომ სულ ასე ჯიუტობს ,,ქართული ოცნება”, ცდილობს დრო გაიყვანოს, ახალ წლამდე მიიყვანოს და ა.შ, მაგრამ ახლა ასე მარტივად არ დგას საკითხი – ადამიანების ჯანმრთელობის საკითხი დგას! ეს ხომ ვერ გაგრძელდება მარტამდე და აპრილამდე?!
ეს ხელოვნური, ვითომ გულთან მიტანილი ელენეს პრობლემა და თითქოს აქ განიცდიან და იქ არ განიცდიან – ძალიან იაფფასიანი მგონია! რაღაცნაირად თავიანთი თავისთვის ეძებენ გამართლებას.
დეპუტატებს კი მინდა ვუთხრა, რომ ხალხნო, ამ ქვეყანაში სულ 3 მლნ ადამიანი დავრჩით და არიან განსხვავებული აზრის მქონე ადამიანებიც. ეს სიჯიუტე, რომელიც ახლა თქვენი მხრიდან ხორციელდება სადამდე მიგვიყვანს, ხომ შეიძლება დავფიქრდეთ?! რა გახდა? ბოლოს და ბოლოს, რუსეთიც ბედნიერია, პუტინიც ბედნიერია, ჩვენი ყველა მტერი ბედნიერია და ჩვენი ყველა გულშემატკივარი მტრად არის გამოცხადებული?! ქვეყანას ერთმანეთის გარეშე ხომ ვერ ავაშენებთ?! გადავუაროთ ერთმანეთს?! რაც მივიღებთ? – კითხვას ვუსვამ ირაკლი კობახიძეს, უმრავლესობის წევრებს, “ქართული ოცნების” მთავრობას“, – განაცხადა გიორგი ვაშაძემ.
ავტორი
ნინი ხიჯაკაძე
