თორნიკე მამალაძე კომენტარს აკეთებს მისი ძმის, დეკანოზ გიორგი მამალაძისთვის COVID-19-ის დადასტურებისა და მსჯავრდებულის ქალაქის საავადმყოფოში გადაყვანის თაობაზე. მისი თქმით, ამ დრომდე არც ადვოკატებს და არც ოჯახის წევრებს არ აქვთ მონახულების უფლება და ამასთან უცნობია სამარტოო საკანში მყოფ დეკანოზს როგორ აღმოაჩნდა კორონავირუსი:
,,ჩვენთან კომუნიკაციაზე ჯერ-ჯერობით არავინ გამოსულა – არც ციხის და არც საავადმყოფოს ადმინისტრაციიდან. ეს ყველაფერი გავიგე ჟურნალისტებისგან.
აქ საგანგაშო ერთადერთი რამ არის მხოლოდ – კოვიდთან დაკავშირებით. ჩემს ძმას შემხებლობა აქვს მხოლოდ ციხის ადმინისტრაციასთან. ის დღემდე იმყოფება სამარტოო საკანში. თუ კი მას დაუდასტურდა COVID-19 გამომდინარეობს იქიდან, რომ რომელიმე ციხის თანამშრომელმა გადადო, მაგრამ მე როგორც ვიცი, ციხის ადმინისტრაციაში როცა შედიან თანამშრომლები PCR ტესტს უტარებენ, უარყოფითი პასუხის შემდეგ უშვებენ დაწესებულებაში.
უცნობია ვისგან გადაედო?! რა ვითარებაში გადაედო?! აქამდე ჩივილები, ყოველ შემთხვევაში, COVID-19-თან დაკავშირებით, ჩემ ძმას არ გააჩნდა.
დღეს ვერ ვახერხებთ ვერც ოჯახის წევრები და ვერც ადვოკატები მასთან შესვლას. ხვალ უკვე გვექნება შესაძლებლობა შევხვდეთ პირადად მას“, – განაცხადა თორნიკე მამალაძემ.
ავტორი
ნინი ხიჯაკაძე
