ველური ბუნების ეროვნული სააგენტოს მორიგი საინტერესო მასალა – გაიცანით კრწანისის ტყეპარკის მობინადრე ფრინველი თეთრი ბოლოქანქარა (მასიქალა, მზეწვია, წყალწყალა, წანწკარა, კუდტანდრუქა) – White wagtail (Motacilla alba).
სხეულის სიგრძე: 16-19სმ. გამრავლების დროს დამახასიათებელია შავი შეფერილობის ყელი, კეფა, თხემი, ნისკარტი, კუდის შუა ბუმბულები და მკერდი; თეთრი ფერის სახე და მუცელი; ნაცრისფერი ზურგი და გრძელი, მუდამ მოქანქარე კუდი. ზამთრობით ფრინველის საერთო შეფერილობა მონაცრისფრო-თეთრია, მხოლოდ შავი ლაქა რჩება მკერდზე.
ბუდეს იკეთებს ქვეებს შორის, კლდეების ნაპრალებში, ფუღუროებში და სხვადასხვა ნაგებობის ხვრელებში. წელიწადში მრავლდება ორჯერ: პირველად აპრილის ბოლოს და მეორედ – ივნისის მეორე ნახევარში. დებს 5-6 კვერცხს.
მისი ჰაბიტატია მდინარეებისა და წყალსატევების სანაპიროები.
IUCN-ის სტატუსი: LC
