ოპოზიცია კვლავ აანონსებს მშვიდობიანი საპროტესტო აქციების გაგრძელებას. მორიგი ასეთი აქცია ,,ერთიანი ნაციონალური მოძრაობის“ თავმჯდომარემ ნიკა მელიამ 11 ოქტომბერსაც დააანონსა. მისი თქმით საპროტესტო მოძრაობა ყოველდღე გაიზრდება და მხოლოდ დროის საკითხია არსებული რეჟიმის დამარცხება:
,,კიდევ ერთხელ, მორიგ ჯერზე ვიხილეთ რეჟიმი, რომელიც მხოლოდ და მხოლოდ ძალადობის, დამნაშავე პოლიციელების, ძალის იმედზეა და რატომ? – იმიტომ, რომ სიმართლე აღარ არის მათ მხარეს, უკვე დიდი ხანია; იმიტომ, რომ ისინი აცნობიერებენ, არჩევნები და ხელისუფლება აქვთ მიტაცებული! ყველაზე უკეთ მათ უწყით, რომ ეს რეალობა არის ასეთი.
შესაბამისად, ისინი იძულებულნი არიან ყოველდღიურად მეტი და მეტი ძალადობა გამოიჩინონ უკიდურესად მშვიდობიანი სამოქალაქო პროტესტის წინააღმდეგ და დღეს, ჩვენ ზუსტად ასეთი სურათი ვნახეთ აქციების დაწყებამდე, გეოგრაფიულად განსხვავებულ ადგილებში, როგორ იძალადეს მშვიდობიან პროტესტანტებზე.
ამ წუთის მდგომარეობით, მათივე ინფორმაციითაც კი 46 მშვიდობიანი აქციის მონაწილე არის დაკავებული და გადაყვანილი ჰყავთ სხვადასხვა ქალაქებში. მათ შორის საკრებულოს დეპუტატები, პოლიტიკოსები, აჭარის უმაღლესი საბჭოს წევრები.
ეს იმას არ ნიშნავს, რომ აქციები, საპროტესტო მოძრაობა შენელდება, პირიქით, ყოველდღე გაიზრდება და გაიზრდება და ჩვენ გავტეხავთ მშვიდობიანი, უწყვეტი, თანმიმდევრული, დისციპლინირებული აქციებით, ამ რეჟიმს.
სწორედ ამიტომ, მე დღეს მინდა, რომ დავაანონსო მორიგი აქცია. ხვალ 14:00 საათზე ვაჟა-ფშაველას ძეგლთან, მეტროს სადგურ ვაჟა-ფშაველასთან გაიმართება აქცია და ველოდებით ყველას!
ყველას, ვისაც უკვე მყარად მიაჩნია, რომ ხელისუფლება კოპირებს რუსეთსა და ბელორუსს. დიახაც, დღეს იყო კალკით გადმოტანის მცდელობა იმ ყველაფრისა, რასაც სჩადის პუტინი და ლუკაშენკო თავისი მოქალაქეების წინააღმდეგ. არაფერი განსხვავებული დღეს ჩვენ აქ არ ვიხილეთ.
ამიტომ ხვალ გელოდებით ყველას 2 საათზე მეტრო-სადგურ ვაჟა-ფშაველასთან ვაჟა-ფშაველას ძეგლთან და ასეთი აქციები გაიმართება ყოველდღე. დიახაც, არც მეტი და არც ნაკლები, ყოველ დღე მანამ, სანამ ეს რეჟიმი არ გატყდება! ამ რეჟიმს მრავალრიცხოვნობით, სიმტკიცით და სიმშვიდით აუცილებლად გავტეხავთ!
არ დაიხევს უკან არავინ! დააკავეთ 46 ადამიანი? – მაგრამ ხომ არ დაგავიწყდათ, რომ ასიათასობით, მილიონზე მეტი აქტიური მოწინააღმდეგე ჰყავს რეჟიმს. ამიტომ ეს რეჟიმი განწირულია მარცხისთვის, საჭირო არის ახლა სიმტკიცე, ნებისყოფა და სიმშვიდე. დროის საკითხია მხოლოდ ამ რეჟიმის დამარცხება!“, – განაცხადა ნიკა მელიამ.
ავტორი
ნინი ხიჯაკაძე
