“აქცია არის საზოგადოების კონსტიტუციური უფლება, არ შეიძლება აქციების დემონიზება!” – პაატა მანჯგალაძე

,,სტრატეგია აღმაშენებლის“ გენერალურმა მდივანმა პაატა მანჯგალაძემ პარლამენტში გამართულ ბრიფინგზე ჩატარებული არჩევნების პოლიტიკური შეფასება გააკეთა. როგორც ოპოზიციონერი ლიდერი აღნიშნავს არ შეიძლება აქციების დემონიზება, რადგან ეს არის მმართველობის ფორმის ერთ-ერთი ნაწილი, როცა ხალხი ცდილობს საკუთარი ხმა და სათქმელი მიაწვდინოს ხელისუფლებას:

,,აქცია არის საზოგადოების კონსტიტუციური უფლება. არ შეიძლება აქციების დემონიზება! აქციები არის პირდაპირი მმართველობის ერთ-ერთი ფორმა, როცა ხალხი ცდილობს თავის ხმა გააგონოს ხელისუფლებას.

ბუნებრივია, საქართველოში, როცა არ გაქვს სამართლიანი სასამართლო, არ გაქვს სამართლიანი არჩევნები – ხალხს, ჩვენი ქვეყნის მოქალაქეებს სრული უფლება აქვთ, შეიკრიბონ ისე, როგორც საჭიროდ ჩათვლიან!

იმისთვის, რომ შესმენილი იქნას ხალხის ხმა ხელისუფლების მიერ, უნდა გამოვიყენოთ ყველა საშუალება. მათ შორის, ეს ტრიბუნაც, აქციებიც, ყველა ფორმა, რომ ის, რაც დღეს ხდება საქართველოში არ გაგრძელდეს მომავალში“, – განაცხადა პაატა მანჯგალაძემ