ზუგდიდის მერობის კანდიდატმა ანზორ მელიამ ,,ერთიანი ნაციონალური მოძრაობიდან“ კომენტარი გააკეთა მიმდინარე არჩევნების მეორე ტურთან დაკავშირებთ და აღნიშნავს, რომ მას სჯერა გამარჯვების. სწორედ ამიტომ მიატოვა საყვარელი საქმე და გადმოვიდა ბრძოლის წინა ფრონტზე:
,,ბედნიერი ვარ, რომ მოვესწარი ამ დღეს. ახლა ვიყავი ჩემი მშობლების სასაფლაოზე. მივედი, ვუთხარი დამლოცეთ-მეთქი და უნდა გენახათ მანქანების რიგი დადგა, ხალხი მორბოდა, ყველა წარმატებებს მისურვებდა, მეხვეოდა, მკოცნიდა – ეს არის საყოველთაო სიყვარული.
მე მწამს, რომ გავიმარჯვებ, მაგრამ ეს მთავრობა ყველაფერზე წამსვლელია. მათ მაინც იციან, ვის მხარეს არის ზუგდიდში უპირატესობა.
დამიდგეს ჩემი კონკურენტი, ერთად გავიაროთ ქუჩებში და ვისაც უფრო მეტი მოწონება ექნება – ვნახავთ!
მე მიხარია, რომ ზუგდიდის მერობის კანდიდატი ვარ! მე თავს შევწირავ ზუგდიდელებს და ყველაფერს გავაკეთებ, რომ შევუმსუბუქო ყოფა-ცხოვრება. მე ამიტომ მოვედი ზუგდიდში და იმიტომ მივატოვე ჩემი საყვარელი საქმე, რომ მარტო კაბინეტში ჯდომით ქვეყანა არ აშენდება.
ფრონტის წინა ხაზზე უნდა ვიბრძოლო! ისე, რომ გლეხს თუ ქალაქელს მივცე ამოსუნთქვის საშუალება და ეს ზუგდიდი დავამსგავსო ჩემი სიყმაწვილის ზუგდიდს, სადაც სიკეთე, მეგობრობა და სიყვარული ჩქეფდა.
უარი უნდა ვუთხრათ ჩვენ დაპირისპირებას, ორად გაყოფას ქვეყნისას. ეს საზიანოა მთლიანად ქართველი ერისთვის“, – განაცხადა ანზორ მელიამ.
ავტორი
ნინი ხიჯაკაძე
