მთავრობის ვიცე-პრემიერმა კულტურის, სპორტისა და ახალგაზრდობის მინისტრმა თეა წულუკიანმა საქართველოს მე-3 პრეზიდენტს მოუწოდა შიმშილობის დასრულებისკენ და ირონიულად მიმართა, რომ 6 წელი ციხეში ყოფნისთვის დიდი დროა, რისთვისაც ჯანმრთელობა აუცილებელია. ამასთან, წულუკიანი იხსენებს იუსტიციის მინისტრობის პერიოდს და აღნიშნავს, რომ ,,ქართული ოცნების“ მმართველობის პირობებში გლდანის მე-18 დაწესებულება კარგად არის მოწყობილი, როგორც თანამედროვები სტანდარტის საავადმყოფო:
,,ბატონო მიშა სააკაშვილო, მიიღე წამლები, იკვებე, იყავი კარგად, რადგან 6 წელი ბევრი დროა და გჭირდება კარგად ყოფნა…
მე, როდესაც ვიყავი იუსტიციის მინისტრი ათეულობით პატიმარი შიმშილობდა ხოლმე. ზოგი აპროტესტებდა თავის ბრალს თუ სხვადასხვა ტიპის სურვილის შეუსრულებლობას. ეს, რა თქმა უნდა, მათი უფლებაა, მაგრამ მე ყველა ამ პატიმარს და დღეს უკვე ამ პატიმრებთან ერთად, მიხეილ სააკაშვილსაც, მოვუწოდებ შიმშილობის შეწყვეტისკენ, მკურნალობისკენ და საკუთარი სიცოცხლისა და ჯანმრთელობის მოფრთხილებისკენ.
ჩემი მინისტრობის დროს ჩატარდა არაერთი მნიშვნელოვანი რეფორმა. მაგალითად, პატიმრებს არ უწევდათ უკვე 2020 წელს ამბოლატორიული თუ სტაციონალური მკურნალობისთვის თვეობით რიგში დგომა და მრავალი სიახლე, რაც მოწმობს, რომ დღეს მე-18 დაწესებულება, ,,ქართული ოცნების“ ხელისუფლების რეფორმების შედეგად, არის ძალიან კარგად მოწყობილი თანამედროვე სტანდარტით მოწყობილი საავადმყოფო“, – განაცხადა თეა წულუკიანმა.
ავტორი
ნინი ხიჯაკაძე
