“საქართველოს პრემიერი პირდაპირ აშანტაჟებს საქართველოს მოსახლეობას” – ხატია დეკანოძე

478

ქუთაისის მერობის კანდიდატი ,,ერთიანი ნაციონალური მოძრაობიდან“ ხატია დეკანოიძე შეფასებებს აკეთებს ირაკლი ღარიბაშვილის მიერ გაკეთებულ კონკრეტულ კომენტარებთან დაკავშირებით და აცხადებს, რომ ეს არის ნიშანი იმისა, თუ როგორ არ ესმით დემოკრატია და არჩევნების მნიშვნელობა. ოპოზიციონერი ლიდერის თქმით, მმართველმა გუნდმა იცის, რომ მე-2 ტურში გაიმარჯვებს ოპოზიცია და ეს აიძულებთ მათ ისაუბრონ საკუთარ მოქალაქეებთან სიძულვილის ენით:

,,ღარიბაშვილის დღევანდელი განცხადება კიდევ ერთი დასტურია იმისა, რამდენად კონტროლიდან და ჩარჩოდან არის გასული ეს ადამიანი, რომელიც ახლა, სამწუხაროდ, ასრულებს საქართველოს პრემიერ-მინისტრის ფუნქციას. მათ შორის, ყოველგვარ პრინციპებს მოკლებული, რაც რეალურად ნიშნავს იმას, რომ მას არ ესმის რას ნიშნავს არჩევნები, დემოკრატია – არ ესმის ზოგადად როგორია საქართველოს მოსახლეობის ინტერესი!

საქართველოს პრემიერი პირდაპირ აშანტაჟებს საქართველოს მოსახლეობას და ამბობს, რომ იმ შემთხვევაში, თუ ოპოზიციური კანდიდატები გაიმარჯვებენ მეორე ტურებში და რა თქმა უნდა, ეს ასე მოხდება, მაშინ საქართველოს ცენტრალური ხელისუფლება შანტაჟით საბოტაჟს გამოუცხადებს საკუთარ მოსახლეობას, რაც არის განცხადებული დანაშაული საკუთარი მოსახლეობის მიმართ და რაც არის გამოცხადებული დანაშაულის ქრონიკა, როდესაც საქართველოს პრემიერ-მინისტრი პირდაპირ უარყოფს თვითმმართველობის პრინციპს, პირდაპირ უარყოფს დემოკრატიის მთავარ პრინციპს და არ აქვთ ინტერესი, რომ საქართველოს მოსახლეობამ გამოხატოს საკუთარი ნება.

შესაბამისად მისი ეს სიძულვილის კამპანია ნიშნავს, რომ მათი შიში გულისხმობს იმას, რომ მათ ნამდვილად აქვთ ძალიან სერიოზული შინაგანი დაბრკოლება – იციან რა, რომ ოპოზიციური კანდიდატები გაიმარჯვებენ პრაქტიკულად ყველგან. ზუსტად ეს აიძულებთ მათ, რომ ყველანაირ პრინციპზე უარი თქვან და საბოტაჟით, შანტაჟის ენით ესაუბრონ საკუთარ მოქალაქეებს“, – განაცხადა ხატია დეკანოიძემ.

ავტორი
ნინი ხიჯაკაძე

კომენტარები პუბლიკაციაზე