პაატა ბურჭულაძე თავისუფლების მოედანზე მიხეილ სააკაშვილის მხარდამჭერ საპროტესტო აქციაზე ვიდეომიმართვით წარდგა. როგორც საოპერო მომღერალი, მსოფლიო ბანი აღნიშნავს, ყველა ოპოზიცური პარტია უნდა გაერთიანდეს დიდი გამარჯვების გზაზე, ხოლო სიბოროტე ყოველთვის დამარცხდება:
„მოგესალმებით ჩემო მეგობრებო! მივესალმები გამოღვიძებულ საქართველოს! მიხარია, რომ ამდენ გულანთებულ ადამიანს ვხედავ ერთად. მიხარია, რომ დღეს ვხედავ რწმენით, სიყვარულითა და გამარჯვების იმედით გაერთიანებულ საქართველოს.
ამ მოედნიდან მინდა მივესალმო საქართველოს მესამე პრეზიდენტს ბატონ მიხეილ სააკაშვილს და ვისურვო, რომ ის მალე ჯანმრთელი და თავისუფალი გვენახოს.
სამწუხარო რეალობაა დღეს საქართველოში! ის, ვინც 9 წლის მანძილზე ხალხის ერთმანეთზე გადამტერების და ფულის კეთების, ქვეყნის ჭაობში ჩათრევის მეტს არაფერს არ აკეთებდა, ასამართლებს თანამედროვე, განვითარებულ და პერსპექტიულ საქართველოს შემქმნელს.
ისეთი შეგრძნება მაქვს, თითქოს 90-იან წლებში დავბრუნდით, სადაც ჩვენს მტერს ხელებიდან გამოვსტაცეთ ჩვენი სამშობლო და ახლაც იგივე რამ გვაქვს გასაკეთებელი.
ახლა კი მეგობრებო არ დაგვავიწყდეს, რომ ძალა ერთობაშია.
ჩვენ ყველანი უნდა გავერთიანდეთ, ყველა ოპოზიცური პარტია, უნდა გავერთიანდეთ ერი და ბერი – ამ დიდი გამარჯვებისთვის.
ჩვენი ძალა ერთობაშია და ჩვენ აუცილებლად გავიმარჯვებთ! ღმერთს უყვარს საქართველო, სიბოროტე ყოველთვის დამარცხდება“, – განაცხადა პაატა ბურჭულაძემ.
ავტორი
ნინი ხიჯაკაძე
