პარლამენტის ფრაქცია ,,ლელო – პარტნიორობა საქართველოსთვის“ თავმჯდომარის მოადგილე სალომე სამადაშვილი კომენტარს აკეთებს 3+3 ინციატივაზე და აღნიშნავს, რომ თუ დღის წესრიგში დგას NATO-ში და ევროკავშირში გაწევრიანება, სრულიად გაუგებარია რა ფორმით უნდა იყოს თანამშრომლობა ამ გეოპოლიტიკურ პროექტზე, რომელიც ეწინააღმდეგება დასავლეთის ინტერესებს:
,,ინიციატივა 3+3, ეს არის გეოპოლიტიკური პროექტი რუსეთის ინტერესების განსამტკიცებლად რეგიონში. პირდაპირ არის მიმართული შესაბამისად დასავლეთის ინტერესების საწინააღმდეგოდ. მათ შორის, არა მხოლოდ ჩვენს რეგიონში – კავკასიაში, ასევე ირანში და შესაბამისად, თურქეთშიც.
ამიტომ საქართველო, რომელიც აცხადებს, რომ მისი სახელმწიფოს დღის წესრიგი არის NATO-ში და ევროკავშირში გაწევრიანება, რა ფორმით და რატომ აპირებს ითანამშრომლოს გეოპოლიტიკურ პროექტთან, რომელიც არის პირდაპირ მიმართული დასავლეთის ინტერესების წინააღმდეგ რეგიონში – არის გაუგებარი!
მე მიმაჩნია, რომ დავით ზალკალიანი უნდა მოვიდეს საგარეო კომიტეტის სხდომაზე, პარლამენტში, უახლოეს მომავალში, სადაც ჩვენ გვექნება საფუძვლიანი, ასე ვთქვათ, დისკუსია“, – განაცხადა სალომე სამადაშვილმა.
ინფორმაციისთვის: საზოგადოებრივი არხის გადაცემა “დღის თემა”-ში წამყვანის, თამთა სანიკიძის შეკითხვაზე, როგორია საქართველოს პოზიცია 3+3 ფორმატთან დაკავშირებით, გადაცემაში სტუმრად მყოფმა, საგარეო საქმეთა მინისტრმა დავით ზალკალიანმა განაცხადა, რომ ამ ფორმატში საქართველოს მონაწილეობა ძალიან გაჭირდება, ოკუპანტ ქვეყანასთან, თუმცა საქართველო ამ დიდ გეოპოლიტიკურ პროექტებში და ურთიერთობებში რაღაც ფორმით მაინც უნდა იყოს, რომ ქვეყანამ თავისი როლი და ფუნქცია არ დაკარგოს, რა თქმა უნდა, არა სახელმწიფო ინტერესების და ოკუპანტთან დათმობის ხარჯზე.
ავტორი
ნინი ხიჯაკაძე
