,,სტრატეგია აღმაშენებლის“ გენერალური მდივანი პაატა მანჯგალაძე ირონიულ კომენტარს აკეთებს ირაკლი ღარიბაშვილის მისამართით და აღნიშნავს, რომ ის არათუ საქართველოს, იგი ვერც იქცა ,,ქართული ოცნების“ პრემიერ-მინისტრადაც. ოპოზიციონერი ლიდერის თქმით, მმართველი ხელისუფლების წარმოადგენლებს მხოლოდ სისუსტის განცდა აიძულებთ, რომ საზოგადოების წინაშე წარმოჩნდნენ ძლიერები:
,,სამწუხაროა, რომ ირაკლი ღარიბაშვილი, მეორე მცდელობის მიუხედავად, ვერ იქცა არათუ საქართველოს, ,,ქართული ოცნების“ პრემიერ-მინისტრადაც, ის არის ბიძინა ივანიშვილის პრემიერ-მინისტრი.
მან ეს არაერთხელ დაადასტურა, როცა ბიძინაობა მოგვილოცა ყველას, დაგვიდგინა დღე, როცა ყოფილი პრეზიდენტის დაჭერა მიუძღვნა ბიძინა ივანიშვილს. ამას აკეთებენ ჩრდილოეთ კორეაში და ისეთ ქვეყნებში, სადაც პოლიტიკური კულტურა არის ძალიან დაბალი.
ცუდია ასეთი ხალხი რომ არის ხელისუფლებაში! ცნობილი გამოთქმაა ხომ, არ გვინდა ესეთი ხალხი ხელისუფლებაშიო, რადგან თავის დონემდე დაიყვანენ საქართველოს. თუ ასე გაგრძელდება სწორედ ღარიბაშვილის დონეზე დავა საქართველო.
განცხადებას, მუქარას რაც შეეხება – ეს არის ,,ქართული ოცნებისთვის“ დამახასიათებელი სტილი. რატომ? – იმიტომ, რომ მათ არ აქვთ პასუხისმგებლობა ხალხის წინაშე. ის, რომ ვიღაცის წინაშე აქვს ანგარიშვალდებულება – სისუსტის განცდა აიძულებს, რომ ძლიერი წარმოჩნდეს საზოგადოების წინაშე და ამიტომ ლაპარაკობენ ყოველთვის ისინი ძალის ენით, ძალის პოზიციით“, – განაცხადა პაატა მანჯგალაძემ.
ავტორი
ნინი ხიჯაკაძე
