,,ერთიანი ნაციონალური მოძრაობის’’ ქუთაისის მერობის კანდიდატი ხატია დეკანოიძე დღეს გამართულ ბრიფინგზე კომენტარს აკეთებს პრემიერ-მინისტრის მიერ გავრცელებულ წერილობით მიმართვაზე. ოპოზიციონერი ლიდერი აღნიშნავს, რომ ირაკლი ღარიბაშვილის წერილობითი მიმართვა სიძულვილის, ადამიანის სიმდაბლის გამოხატულებაა:
,,ღარიბაშვილის დღევანდელი წერილობითი მიმართვა არის მორიგი მაგალითი, მაგრამ მე ვფიქრობ გამორჩეული, იმ ამორალურობის და ინტელექტუალური სიმდაბლის, იმ ფსკერის, რომელზეც დღეს იმყოფება პრემიერ-მინისტრად წოდებული ბიძინა ივანიშვილის მსახური, მთელი ,,ქართული ოცნება“ და ხელისუფლება.
სიძულვილის, ადამიანის სიმდაბლის და ზოგადად ყველაზე უფრო ამაზრზენი დამოკიდებულების გამოხატულება – ზუსტად ეს სიტყვები შეეფერება ღარიბაშვილის იმ მიმართვას, რომელიც დღეს გავრცელდა. გულწრფელად რომ გითხრათ, ასეთი მიმართვა, სიმდაბლე, არაადამიანურობა – შეშურდებოდა პუტინის გამორჩეულ პროპაგანდისტებსაც კი.
ამ მიმართვით, მე ვფიქრობ, ყველამ საბოლოოდ გაიგო, უფრო სწორად, საქართველოს საზოგადოებამ ძალიან კარგად იცის, რომ ,,ქართული ოცნების“ ხელისუფლება, ბიძინა ივანიშვილის ხელისუფლების მიზანი მართმსაჯულება და სამართალი კი არ არის მიხეილ სააკაშვილის მიმართ, არამედ რეალურად გადაწეროს საქართველოს ისტორია, შეურაცხყოფა მიაყენოს ვარდების რევოლუციას და დიახ, ზოგადად, სიმდაბლით გამორჩეული ადამიანები, რომელსაც წარმოადგენს ღარიბაშვილი მის უფროსთან ერთად – ცდილობენ, რომ მთელი საქართველოს სახელმწიფო დაამცირონ. მათ ძალიან კარგად იციან, რომ მიხეილ სააკაშვილი, რომელიც არის დღეს ბიძინა ივანიშვილის და პუტინის პირადი ტყვე – წარმოადგენს მათთვის ძალიან მნიშვნელოვან შიშის ობიექტს. მათ ძალიან კარგად იციან, რომ მიშა საპყრობილეში მათთვის არის გამოუვალი მდგომარეობა და არა მიშასთვის. ის ჟინი დაუოკებელი ბრძოლის, ქვეყნის გადასარჩენად, არის ზუსტად ის შიში, რომლითაც შეპყრობილია ეს პატარა დიქტატორი და მისი ყველა მსახური.
მიხეილ სააკაშვილი შიმშილობს, მაგრამ იგი არის მხნედ, კარგად. მისი აქ ჩამოსვლა იყო ზუსტად ის, რომ მისთვის და ჩვენთვის საქართველოს მომავალი არის ძალიან მნიშვნელოვანი.
ეს მიმართვა, რომელიც მართლაც გამორჩეულია იმ სიმდაბლით, რომელიც ახლა ახასიათებს ,,ქართულ ოცნებას“, ღარიბაშვილს და ბიძინა ივანიშვილის პირად მსახურებს – ზუსტად მიუთითებს იმას, რომ სააკაშვილი პოლიტიკური მართლმსაჯულების მთავარი ობიექტია“, – განაცხადა ხატია დეკანოიძემ.
ავტორი
ნინი ხიჯაკაძე
