საქართველოს კულტურის, სპორტისა და ახალგაზრდობის მინისტრმა თეა წულუკიანმა მთავრობის სხდომის შემდეგ გამართულ ბრიფინგზე ოპოზიციას მიუსამძიმრა ,,ქართული ოცნების“ ხელისუფლებაში ყოფნა და განაცხადა, რომ მომდევნო 3 წელი არ იქნება რიგგარეშე საპარლამენტო არჩევნები. ასევე, ხელისუფლების ოპონენტებს შეახსენა, რომ მიხეილ სააკაშვილი დღეს დაპატიმრებულია:
,,ჩვენმა პარტიამ დადო ის შედეგი, რომელიც ბევრად მეტია ვიდრე ვიღაცისთვის სასურველი 43 და ნაკლები პროცენტი. შესაბამისად, ასევე მარცხი განიცადა პოლიტიკურმა დესტრუქციულმა ოპოზიციამ, რომელიც ფიქრობდა, რომ დღეს ისაუბრებდა რიგგარეშე საპარლამენტო არჩევნებზე. შესაბამისად, მათ მოუწიათ უკვე, რომ ამ იდეას დამშვიდობებოდნენ.
ჩვენ გავაგრძელებთ მომდევნო 3 წელი ცხოვრებას მშვიდობიან, სტაბილურ და იმედი მაქვს, ცოტა უფრო მეტად პოლიტიკურად დამშვიდებულ ატმოსფეროში.
დღეს, მავანი ფიქრობდა, რომ იქნებოდა ხელისუფლებაში, თუმცა ახლა დასრულდა მთავრობის სხდომა და კვლავ მთავრობას ხელმძღვანელობდა ირაკლი ღარიბაშვილი. შესაბამისად, ეს იმედგაცრუებაც არის მათ ანგარიშზე და მათი ბელადი არის ციხეში.
კარგია მეორე ტური. ოპოზიციას ისღა დარჩენია, რამდენიმე ადგილას ჩვენს ქვეყანაში, მეორე ტურში მონაწლეობა მიიღოს.
სად არის საპროტესტო აქციები და რევოლუცია?! რატომ არის დღეს ღარიბაშვილი პრემიერ-მინისტრი?! რიგგარეშე არჩევნები არ არის, ღარიბაშვილი საქართველოს პრემიერ-მინისტრია, ,,ქართული ოცნება“ არის ხელისუფლებაში – ამას გისამძიმრებთ და მივესალმები იმ უპრეცედენტო ძალისხმევას, რომელიც ცესკომ გაწია და თქვენ გაგაჩუმათ თავისი ძალიან მაგარი საქმიანობით და ,,ორგანიზებულიო“ – ასე თქვა საერთაშორისო დამკვირვებელმა, ეს სიტყვები მე არ მეკუთვნის“, – განაცხადა თეა წულუკიანმა.
ავტორი
ნინი ხიჯაკაძე
