,,მესამე ძალა – სტრატეგია აღმაშენებლის“ ლიდერმა გიორგი ვაშაძემ საგანგებო ბრიფინგზე მოსახლეობას კიდევ ერთხელ მოუწოდა არჩევნებზე მისვლისა და საკუთარი აზრის დაფიქსირებისკენ ქვეყნის ბედის შესაცვლელად. პარტიის თავმჯომარემ აღნიშნა ოპოზიციის ძირითადი იდეა 2 ოქტომბრის რეფერენდუმისთვის: “ჩავაბაროთ წარსულს ეს დაპირისპირება, შუღლი და ავირჩიოთ ერთიანობა, თანხმობა, განვითარება, აღმშენებლობა, რომელიც ასე სჭირდება ჩვენს ქვეყანას”…
,,დღევანდელმა მოვლენებმა კიდევ ერთხელ აჩვენა, რომ ასე გაგრძელება შეუძლებელია! ქვეყანაში არის უმძიმესი დაპირისპირების ფონი. ეს ფონი ყველამ ერთად ხვალინდელ არჩევნებზე უნდა მოვხსნათ.
მეგობრებო, ჩვენ უნდა ავირჩიოთ ცვლილებები! მშვიდობიანი ცვლილებები! აღარ არის დრო დაპირისპირების, ერთმანეთის წინააღმდეგ შუღლის. ახლა საქართველოს ისე, როგორც არასდროს, სჭირდება ეროვნული თანხმობა, სჭირდება ცვლილებები, რომელიც საქართველოს მოუტანს ძლიერ ინსტიტუციებს, სამართლიან სასამართლოს, იმ მნიშვნელოვანი განვითარების ნაბიჯს, რომელსაც ჩვენი დასავლელი პარტნიორები ჩვენგან ელიან.
საქართველოს მოქალაქეებს გვაქვს პასუხისმგებლობა მთელ მსოფლიოს გავაგონოთ ხვალინდელ დღეს ჩვენი ხმა! უამრავი ევროპარლამენტარი, ჩვენი ევროპელი პარტნიორი ჩამოსულია საქართველოში და ისინი ელოდებიან რას გადაწყვეტენ საქართველოს მოქალქეები!
რაც არ უნდა პოლიტიკოსები ვიყოთ, პირველ რიგში ვართ ადამიანები. არ მგონია ვინმეს ახარებდეს ქვეყნის პრეზიდენტის დაკავება.
ეს დღე კიდევ ერთხელ აჩვენებს რამდენად მნიშვნელოვანია ეროვნული თანხმობა იმისთვის, რომ ქვეყანა წავიდეს წინ, გვქონდეს ძლიერი სასამართლო, დავიწყოთ აღმშენებლობა და ჩავაბაროთ წარსულს, აი, ეს დაპირისპირება, ურთიერთკინკლაობა, შუღლი, რომელიც არ გვაძლევს გასაქანს ქვეყნის განვითარების.
არ დაგავიწყდეთ ხვალინდელი არჩევნები არის ცვლილებების არჩევნები. თქვენზეა დამოკიდებული რა გადაწყვეტილებას მიიღებთ. ჩვენ – ,,მესამე ძალა“ და ,,სტრატეგია აღმაშენებელი“ გამოვედით მესამე ძალის იდეით იმიტომ, რომ ყოველთვის არსებობს ალტერნატივა დაპირისპირების და ეს ალტერნატივა არის თანხმობა, თანამშრომლობა, ერთად დგომა.
არ გვაქვს ჩვენ ქართველებს არაფერი გასაყოფი. გვაქვს ერთი სამშობლო, სახელმწიფო და ეს სახელმწიფო უნდა ავაშენოთ ერთიანი ძალისხმევით, ენერგიით. ამიტომ მშვიდობიანად, წყნარად მივიდეთ ხვალ არჩევნებზე და დავაფიქსიროთ ჩვენი აზრი. ჩავაბაროთ წარსულს ეს დაპირისპირება, შუღლი და ავირჩიოთ ერთიანობა, თანხმობა, განვითარება, აღმშენებლობა, რომელიც ასე სჭირდება ჩვენს ქვეყანას“, – განაცხადა გიორგი ვაშაძემ.
ავტორი
ნინი ხიჯაკაძე
