“თუ კიდევ ერთხელ დაარღვია კანონი და შემოიჭრა საქართველოში უკანონო გზით – ეს იმას ნიშნავს, რომ მისი ნებისმიერი სხვა განცხადება მშვიდობიანი არჩევნების ჩატარების თაობაზე ყოფილა ტყუილი” – გიორგი ვოლსკი

პარლამენტის თავმჯდომარის პირველმა მოადგილემ გიორგი ვოლსკიმ ვარაუდი გამოთქვა და შეფასება გააკეთა ექსპრეზიდენტ მიხეილ სააკაშვილის საქართველოს საზღვრის გადმოკვეთასთან დაკავშირებით. მისი განცხადებით, ბევრი ვარიანტის განხილვა შეიძლება, თუ როგორ შეიძლება შემოსულიყო ქვეყანაში:

,,იმაზე მეტს ვერაფერს გეტყვით, რაც გითხარით. კონკრეტულ ინფორმაციასთან დაკავშირებით გამოვიდა კომპეტენტური სტრუქტურები და განცხადებები გააკეთეს – ეგ ერთი.

მეორე საკითხია ის, რომ ვერც მისი მხარდამჭერები მთლად ვაჟკაცურად ვერ ამბობენ იმას, რომ გადმოკვეთა საზღვარი და ჩუმად შემოიპარა, კანონდარღვევით საქართველოში.

ნუ არის ვარიანტი, ვთქვათ, რომ რუსეთს ხელი შეეწყო გადმოეკვეთა საზღვარი ჯერ აფხაზეთის და შემდეგ, აი, იქ რაღაცა შემოპარულიყო – მათივე დახმარებით. ბევრი სხვა ვარიანტი შეიძლება განვიხილოთ, მაგრამ ესეთი რამ არ მომხდარა!

თუ ესეთი რამ მოხდა და ,,ნაციონალურ მოძრაობას“ გააჩნია ასეთი პოლიტიკური პოზიცია, რომ მათი ლიდერი ნამდვილად აქ იმყოფება და მან კიდევ ერთხელ დაარღვია კანონი, შემოიჭრა საქართველოში უკანონო გზით – ეს იმას ნიშნავს, რომ მისი ნებისმიერი სხვა განცხადება მშვიდობიანი არჩევნების ჩატარების თაობაზე ყოფილა ტყუილი“, – განაცხადა გიორგი ვოლსკიმ.

ავტორი
ნინი ხიჯაკაძე