“მიხეილ სააკაშვილს არ გადმოუკვეთავს საქართველოს სახელმწიფო საზღვარი და მას არ დაუტოვებია უკრაინის სახელმწიფო საზღვარი” – შს მინისტრის მოადგილე

შინაგან საქმეთა სამინისტროში გამართულ ბრიფინგზე, მინისტრის მოადგილე ალექსანდრე დარახველიძე უწყების მიერ გაკეთებული განცხადებას გააცნობს საზოგადოებას და კონკრეტულ პოზიციას აფიქსირებს მიხეილ სააკაშვილის საქართველოში შემოსვლასთან დაკავშირებით:

“რაც შეეხება მიხეილ სააკაშვილის საკითხს, დღეს შინაგან საქმეთა სამინისტრომ გაავრცელა განცხადება, სადაც ცალსახად იყო დაფიქსირებული, რომ მიხეილ სააკაშვილს საქართველოს სახელმწიფო საზღვარი არ გადმოუკვეთავს. ჩვენ აქტიური კომუნიკაცია და ურთიერთობა გვქონდა უკრაინულ მხარესთან და მათგანაც დარწმუნებით და ცალსახად შეგვიძლია გითხრათ, მიხეილ სააკაშვილს უკრაინის სახელმწიფო საზღვარი არ დაუტოვებია.

კიდევ ერთხელ ვიმეორებ ცალსახად და ერთმნიშვნელოვნად – მიხეილ სააკაშვილს არ გადმოუკვეთავს საქართველოს სახელმწიფო საზღვარი და მას არ დაუტოვებია უკრაინის სახელმწიფო საზღვარი.

მიხეილ სააკაშვილი არის ძებნილი, მის მიმართ არის დამდგარი განაჩენი, შესაბამისად თუკი ის გადმოკვეთავს ქვეყნის საზღვარს, მას დავაკავებთ და გადავიყვანთ შესაბამის პენიტენციურ დაწესებულებაში.

გავრცელებულ ვიდეოებთან დაკავშირებით კომენტარს არ ვაკეთებ,” – განაცხადა ალექსანდრე დარახველიძემ.