პრემიერ-მინისტრმა ირაკლი ღარიბაშვილმა ჟურნალისტებთან მწვავე და ირონიული კომენტარი გააკეთა საქართველოს მე-3 პრეზიდენტის მიხეილ სააკაშვილის დაბრუნებასთან დაკავშირებით. მისი თქმით ნებისმიერ პროვოკაციაზე ყველა მკაცრად აგებს პასუხს, ხოლო ექსპრეზიდენტი მაშინვე აღმოჩნდება ციხეში, როგორც კი საქართველოს საზღვარს გადმოკვეთს:
,,რა თქვა მიხომ, რა თქვა? ჩამოვდივარო?
საერთოდ, მე მინდა ახლა, რომ მოსახლეობას ავუხსნათ: ეს კაცი უკვე 8 წელია რომ იმუქრება ჩამოვა, ჩამოვა და არ ჩამოდის, ვერ ჩამოდის. იმიტომ, რომ მშიშარა კაცია. იცის, რომ შევა ციხეში.
ჩვენ ხალხს რომ ავუხსნათ კიდევ ერთხელ: სააკაშვილის ერთადერთი ამოცანა და მისი მიზანი არის ჩვენი ქვეყნის არეულობა, დესტაბილიზაცია და ქაოსის შემოტანა. ერთადერთი მისი სურვილი და მიზანი უკავშირდება ძალაუფლების დაბრუნებას, რაც არის მიუღწეველი ოცნება სააკაშვილისა და მისი მკვლელი, მჩაგვრელი გუნდისთვის.
დღეს სახელმწიფო არის ძლიერი. მიხოს და მის ბანდას არ ეგონოს, რომ ეს არის 2003 წელი. ნებისმიერ პროვოკაციაზე ყველა მკაცრად აგებს პასუხს, კანონის ფარგლებში, რა თქმა უნდა.
დავუშვათ, ჩამოვიდა ეს ლაჩარი კაცი. გადაწყვიტა და გამოაგდეს, ჩამოვიდა. რა უნდა მოხდეს? – კანონის აღსრულებას ამ მიწაზე ვერავინ ვერ აღუდგება წინ და შეეწინაღმდეგება. ვინც შეეწინააღმდეგება, ისიც შევა ციხეში. ამის გარანტიას ვიძლევით კანონის და სახელმწიფოს სახელით.
მეორე, რაც მინდა ვთქვა, რომ სააკაშვილი არის მსჯავრდებული და იგი იმსახურებს ციხეს. იმიტომ, რომ მან გამოუსწორებელი შედეგები, ზიანი მოუტანა ჩვენს ქვეყანას, მოსახლეობას.
ამას გარდა, მე მინდა ვთქვა, ის მოწოდებები, რომ ხალხი გამოვა და დამიცავს არის, რა თქმა უნდა, სრული სიცრუე და სიყალბე. რისი თავი აქვს მაგ საცოდავს?! – 5 000 კაცის შეგროვება ძლივს შეუძლიათ, ისიც პიკის დროს. ჩვენ გვკითხონ რამდენი ადამიანის, მხარდამჭერის მობილიზება შეგვიძლია ჩვენს გუნდს?! ზოგადად ვამბობ, რომ სააკაშვილს დახვდება 100 ათასობით ადამიანი – მასზე გაბრაზებული, გამწარებული.
სააკაშვილი როგორც კი შემოვა ჩვენს მიწაზე, ჩვენს ტერიტორიაზე შემოდგამს ფეხს, სახელმწიფო გასცემს პასუხს, იმავე წამს იქნება დაკავებული და შებრძანებული ციხეში. ვინც ხელს შეუშლის ამ პროცესს, ყველა ადამიანი დაისჯება უმკაცრესად კანონის შესაბამისად“, – განაცხადა ირაკლი ღარიბაშვილმა.
ავტორი
ნინი ხიჯაკაძე
