საქართველოში ევროკავშირის ელჩის კარლ ჰარცერის საკმაოდ კრიტიკულ განცხადებას სახელმწიფო უსაფრთხოების სამსახურიდან გამოტანილ, ფარული მოსმენების ბაზაზე მომზადებულ ე.წ. კრებსებთან დაკავშირებით, პარტია ,,ქართული ოცნების” თავმჯდომარე ირაკლი კობახიძე პასუხობს და აცხადებს, რომ მიმართვა აცდენილი იყო დიპლომატიურ სტანდარტებს:
,,როდესაც არის, თუნდაც ნიშნები იმისა, რომ შეიძლება ვიღაც ვიღაცას უსმენდეს უკანონოდ, რა თქმა უნდა, ამით ჩვენი მეგობრები დაინტერესდებოდნენ კიდეც.
ამიტომ ყველაფერს უნდა მოეფინოს ნათელი – ვინ რა ინფორმაცია გაიტანა, რა იყო ავთენტური, რამდენად შეესაბამება ეს ინფორმაციები სინამდვილეს და ა.შ.
ამაზე ზოგადი შეფასებები ჩვენგან იცით. თუმცა, რაც შეეხება კონკრეტულად ელჩის განცხადებას, მე არ ვარ დიპლომატი და შეიძლება ვერ ვერკვევი ამ საკითხებში ბოლომდე, მაგრამ დიპლომატიურ სტანდარტებს, მე მგონი, ოდნავ იყო აცდენილი ეს განცხადება, მითუმეტეს ამ წინასაარჩევნო პერიოდში”, – განაცხადა ირაკლი კობახიძემ.
ინფორმაციისთვის: ფარულ მოსმენებთან დაკავშირებით და განმარტებებისთვის ბრიუსელში ევროკავშირის სათავო ოფისში საქართველოს ელჩის დაბარების საკითხთან დაკავშირებით განცხადება გააკეთა კარლ ჰარცელმა:
“თქვენ უკვე იცით ბრიუსელის რეაქცია მოსმენების შესახებ. ჩვენ ამას ძალიან სერიოზულად ვიღებთ, იმიტომ რომ ეს კითხვებს აჩენს. როგორც იცით, დიპლომატიურ ურთიერთობებს ვენის კონვენცია განსაზღვრავს და არ მივიჩნევთ ბუნებრივად, რომ ისეთი ახლო მეგობარი და პარტნიორი, როგორიც საქართველოა, ასეთ მოქმედებებშია ჩართული ჩვენს წინააღმდეგ.
ამ მიზეზით, გუშინ საქართველოს ელჩი ევროკავშირში შეხვედრაზე დაიბარეს ბრიუსელში, ევროკავშირის სათავო ოფისში იმისთვის, რომ ევროკავშირის პოზიციები ყოფილიყო გარკვეული და შემდგომი ნაბიჯები იქნას გადადგმული“, – განაცხადა კარლ ჰარცელმა.
ავტორი
ნინი ხიჯაკაძე
