პარტია “საქართველოსთვის” თავმჯდომარე გიორგი გახარია მხარდამჭერებთან შეხვედრისას იმ გარემოების შესახებ საუბრობს, რომ პოლიტიკაში დარჩენის გადაწყვეტილების მიღებისას გააზრებული ჰქონდა, მისი და მისი გუნდის წინააღმდეგ დიდი ზეწოლა წამოვიდოდა, თუმცა “ქართული ოცნების” დღევანდელი მოქმედებები კიდევ უფრო მეტად არწმუნებს, პოლიტიკაში დარჩენის და ახალი ბრძოლის წამოწყების სისწორეში:
„მე ძალიან კარგად – დეტალურად ვიაზრებდი, რა მოჰყვებოდა ყველაფერ ამას და ძალიან კარგად მესმოდა, რომ ბევრი ადამიანი, ვინც ჩემს გვერდით იქნებოდა, გარკვეული დისკომფორტის და ზოგიერთები რისკის ქვეშ დადგებოდნენ. მაგრამ მართლა გეუბნებით – ვერ წარმომედგინა ის რაც, დღეს ხდება. და ის რაც ახლა ხდება, კიდევ უფრო მარწმუნებს, რომ ეს ნაბიჯი გადასადგმელი იყო და უნდა გადამედგა,“ – აღნიშნა გიორგი გახარიამ.
ექსპრემიერმა ბოლო ორი დღის მანძილზე პარტია „საქართველოსთვის“ წევრებისა და მხარდამჭერების წინააღმდეგ განხორციელებული ზეწოლების და მოსყიდვის შესახებაც ისაუბრა.
„დღეს ერთ-ერთ მუნიციპალიტეტში ჩვენი კანდიდატი – ახალგაზრდა ქალის რომელიც მასწავლებელია ჩვენი მართლმადიდებლური ეკლესიის მიერ მართულ სკოლაში – დირექტორმა დაიბარა პირდაპირ უთხრა ერთ-ერთი მაღალი რანგის სასულიერო პირის სახელით, რომ აირჩიე – ან იქ უნდა იყოო, ან გაგიშვებთო. გუშინ მაგალითად, ვიყავით დევნილთა დასახლებაში, სადაც საკითხი ასე დგას, რომ თუ მიხვალ გახარიასთან ღონისძიებაზე, სოციალურ დახმარებას მოგიხსნითო -დევნილებს ეუბნებიან ამას. ჩვენს ფოთის მერობის კანდიდატთან მივიდნენ და ეუბნებიან, რომ 200 000 ლარს მოგცემთო, აი ამ სიაში ნებისმიერ მიწას ხელი დაადეო და 3000 ლარიც ყოველთვიურად გექნებაო. არ ვიცი – წარმოუდგენელი რაღაცაა. მე მესმის აქ რაშია პოლიტიკური ლოგიკა – ჩვენ რაღაც საკითხებში მართლა ხელს ვუშლით,“ – განაცხადა პარტიის თავმჯდომარემ.
გიორგი გახარიამ მხარდამჭერებთან საუბრისას აღნიშნა, რომ ქვეყანაში გარემოს ცვლილების გამო არ მოელოდა თუ ქართული ოცნება ძალაუფლების შენარჩუნებისთვის ფასეულობებზე უარს იტყოდა მხოლოდ იმიტომ, რომ ძალაუფლება არავისთვის გაენაწილებინა.
„რეალურად, მართლა ძალიან ბევრი კარგი საქმე გაკეთდა – შეცდომებიც ბევრი იყო. მე კარგის ნაწილიც ვიყავი და ცუდის ნაწილიც ვიყავი, ბევრი რამე მომხდარა ჩვენს თავს, მაგრამ ვერ წარმომედგინა, არ ვუშვებდი, რომ ოცნება ძალაუფლების შენარჩუნების მიზნით ფასეულობებზე იტყოდა უარს. ვფიქრობდი, რომ ეს იმდენად მეორე ხარისხოვანია, რომ არანაირი პრობლემა არაა – ახლა ქვეყანაში უკვე ისეთი გარემოა, რა მოხდა მერე თუ ვიღაცასთან პასუხისმგებლობა გაიყავი, რა მნიშვნელობა აქვს ვინ იქნება სოფლის მეურნეობის მინისტრი და ჯანდაცვის მინისტრი ხომ? – მაგრამ არა,“ – ამბობს გახარია.
ინფორმაციას პარტია “საქართველოსთვის” პრესსამსახური ავრცელებს
