ველური ბუნების ეროვნული სააგენტო აგრძელებს საინტერესო მასალების გამოქვეყნებას საქართველოს ფაუნის შესახებ. ამჯერად გაიცანით კრწანისის ტყეპარკის მობინადრე ფრინველი რუხი ბოლოქანქარა (მთის ბოლოქანქარა) – Grey wagtail (Motacilla cinerea).
სხეულის სიგრძე: 17-20 სმ. დამახასიათებელია რუხი შეფერილობის სხეულის ზედა ნაწილი და ყვითელი შეფერილობის ქვედა მხარე. ნისკარტის ძირიდან თავის გვერდებზე გასდევს ორი თეთრი ზოლი: ერთი თვალებს ზემოთ, მეორე – ლოყებს ქვემოთ. გამრავლების დროს მამალს ყელი შავი აქვს.
ბუდეს იკეთებს კლდის ნაპრალებში, ქვებს შორის ან წყალზე გადმოშვერილ ხის ფესვებში. წელიწადში მრავლდება ორჯერ: პირველად მარტის ბოლოს ან აპრილის დასაწყისში და მეორედ – ივნისის მეორე ნახევარში. დებს 4-6 კვერცხს.
მისი ჰაბიტატია მთის მდინარეების, ტბების, ნაკადულების ქვა-ღორღიანი სანაპიროები.
IUCN-ის სტატუსი: LC