“ჩვენი 3 პარტია – ,,ევროპული საქართველო“, ,,გირჩი“ და ,,დროა“ შეთანხმებულად გავა მაჟორიტარების ნაწილში” – ელენე ხოშტარია

ადგილობრივი თვითმმართველობის არჩევნებამდა 52 დღე დარჩა. ოპოზიციაში კვლავ მიმდინარეობს შეჯერება მაჟორიტარების კანდიდატების წარდგენასთან დაკავშირებით. დღეს განცხადება გააკეთა სამმა ოპოზიციონერმა ლიდერმა – ელენე ხოშტარიამ, ზურაბ ჯაფარიძემ და გიგა ბოკერიამ იმის თაობაზე, რომ არჩევნებზე ერთობლივად, შეჯერებულად წარადგენენ მაჟორიტარ კანდიდატებს.

,,ჩვენ, ამ კოალიციური შეთავაზების ფარგლებში, დღეს შევთანხმდით, რომ თბილისში ჩვენი 3 პარტია შეთანხმებულად გავა მაჟორიტარების ნაწილში. ჩვენ მივესალმებით ,,ნაციონალური მოძრაობის“ გადაწყვეტილებას, რომ თბილისში მაჟორიტარები არ დაააყენოს და დაუთმოს ეს დანარჩენ ოპოზიციას. შესაბამისად, ,,ევროპული საქართველო“, ,,გირჩი მეტი თავისუფლება“ და ,,დროა“ შეთანხმდა თუ რა ტიპის განაცხადს გავაკეთებთ. ძალიან მალე კონკრეტულ კანდიდატებს შემოგთავაზებთ“, – განაცხადა მოძრაობა ,,დროას“ ლიდერმა ელენე ხოშტარიამ.

,,ეს არ არის ჩვეულებრივი რიგითი ადგილობრივი არჩევნები. 2 ოქტომბერს გადაწყდება ,,ქართულ ოცნებას“ აქვს თუ არა კიდევ უფლება დარჩეს ხელისუფლებაში. ჩვენ გვჯერა, რომ საბოლოო ჯამში, ამ არჩევნებზე მმართველი გუნდი დამარცხდება. ჩვენ გავალთ, ეს ქვეყანა გავა ხელახალ არჩევნებზე და ამ ქვეყანას მიეცემა შანსი, რომ რაღაცა მაინც შეიცვალოს. რისი შანსიც მანამ სანამ ,,ქართული ოცნება“ არის ხელისფლებაში არ არსებობს. ჩვენ საარჩევნო კამპანიას ყველა პარტია ვატარებთ ინდივიდუალურად, მაგრამ ასევე, მნიშვნელოვანი გვგონია იმის დემონსტრირება, რომ დღეს არსებულ ოპოზიციას აქვს უნარი, იაროს კონსესუსების და შეთანხმებების გზით“, – განაცხადა ,,გირჩი მეტი თავისუფლების“ ლიდერმა ზურაბ ჯაფარიძემ.

,,ეს არის არჩევნები, რომლის შედეგადაც ჩვენ უნდა გამოვიყენოთ ისტორიული შანსი, რომ ეს ქვეყანა დაბრუნდეს, როგორც ნაწილი თავისუფალი სამყაროსი, სადაც ჩვენი ისტორიული არჩევანია, ამ ქვეყნის დამოუკიდებლობა იყოს დაცული და სუვერენიტეტი გარე მტრისგან. ამ ქვეყნის შიგნით იყოს დაცული პიროვნული თავისუფლება ყველა ჩვენი მოქალაქის.

ოპოზიციის უდიდეს მაწილს, კრიტიკულ ნაწილს ესმის კარგად, რომ ამ მავნებლური, საზიანო და სახიფათო ხელისუფლების გამოცვლის შემდეგაც არცერთი პოლიტიკური ძალის ხელში აღარ უნდა მოხდეს კონცეტრაცია სრული ძალაუფლების’’, – განაცხადა ,,ევროპული საქართველოს“ თავმჯდომარემ გიგა ბოკერიამ.

შეგახსნებთ, რომ ,,ერთიანი ნაციონალური მოძრაობა’’ თბილისში მაჟორიტარობის კანდიდატებს არ დაასახელებს და ასპარეზს სხვა ოპოზიციურ პარტიებს უთმობს.

ავტორი
ნინი ხიჯაკაძე