“პარტიის იმ ვიღაც ახალმა გამოჩეკილმა ბოსებმა გადაწყვიტეს, რომ პარტიის ინტერესები უნდა დაეყენებინათ ქვეყნის და სახელმწიფოს ინტერესებზე უფრო მაღლა” – გიორგი გახარია

გიორგი გახარია განმარტებებს აკეთებს თანამდებობის დატოვებისა და „ქართული ოცნებიდან“ წამოსვლის მიზეზზე:

„ყველას უნდა გვესმოდეს, რომ ჩვენც ოცნებიდან მოვდივართ – მეც ოცნებიდან მოვდივარ. ჩვენ ეს არც გაგვიკეთებია და არ უნდა ვიკადროთ – ჩვენი წარსულ არ უნდა ვლანძღოთ და ვაძაგოთ – იმისდამიუხედავად, იმათმა რაც არ უნდა იკადრონ. იქ ჩვენი ბევრი ღირსეული მეგობარი დარჩა. ოცნებაში მთავარი პრობლემა იყო, რომ რაღაც მომენტში პარტიამ უბრალოდ გადაწყვიტა – პარტიის იმ ვიღაც ახალმა გამოჩეკილმა ბოსებმა გადაწყვიტეს, რომ პარტიის ინტერესები უნდა დაეყენებინათ ქვეყნის და სახელმწიფოს ინტერესებზე უფრო მაღლა. ეს იყო ჩემთვის მიუღებელი და ამიტომ წამოვედი,“ – აცხადებს გიორგი გახარია.

ყოფილი პრემიერი ოპოზიციის შესახებაც საუბრობს და აცხადებს, რომ ყველაზე დიდ ოპოზიციურ პარტიას 9 წლის შემდეგაც არ შეუცვლია რიტორიკა და ხელისუფლებაში ძალადობით უნდათ მოსვლა:

„ზოგიერთმა ვერც გაიგო რას ნიშნავს, როცა ვთქვით, რომ რავის წინააღმდეგ არა ვართ. ზოგიერთმა ისიც ვერ გაიგო როცა ვთქვით, რომ ჩვენ ჯერ ნაცები უნდა დავამარცხოთ და მერე უნდა შევუდგეთ ხელისუფლებაში სრულად მოსვლას. რატომ ვამბობ ამას – რა თქმა უნდა ჩვენ აქ უნდა გავიმარჯვოთ, მაგრამ ნაცების დამარცხება ჩემს გაგებაში ნიშნავს იმას, რომ 9 წლის შემდეგაც, როდესაც ამ ხალხმა ჩვევა და რიტორიკა არ შეიცვალა და მაინც პარლამენტში შევარდნით და ძალადობით უნდათ ხელისუფლებაში მოსვლა – არ შეიძლება რომ ამ პარტიას ქონდეს იმხელა მხარდაჭერა, რომ მეორე იყოს და ყოველთვის ყველაზე დიდ ოპოზიციას ეძახდეს თავის თავს. ეს ვიგულისხმე, ეს ძალიან სწორია და დღესაც ამავე აზრზე ვარ,“ – აღნიშნავს პარტია “საქართველოსთვის” თავმჯდომარე.