“სტრატეგია აღმაშენებლის” ლიდერმა გიორგი ვაშაძემ, ევროპული საბჭოს პრეზიდენტთან შეხვედრის შემდეგ, ჟურნალისტებთან შეფასებები გააკეთა ქვეყანაში მიმდინარე პროცესებსა და მმართველ პარტიასთან მიმართებაში:
“სამწუხაროდ, “ქართულმა ოცნებამ” ევროპისკენ ინტეგრაციის გზას გადაუხვია ან ცდილობს რომ გადაუხვიოს.
მას არ უნდა დემოკრატიული რეფორმები განახორციელოს ქვეყანაში, უნდა რომ ხელისუფლება ჰქონდეს მიტაცებული, არ უნდა ძლიერი ინსტიტუციები, არ უნდა თავისუფალი არჩევნები და უნდა რომ ისევ იძალადოს საქართველოს მოქალაქეებზე, მათ შორის ჟურნალისტებზე. სწორედ ამაზე გვქონდა ჩვენ საუბარი.
ვერ დავუახლოვდებით ჩვენ ევროკავშირს, თუ საქართველოში პროცესები ისევ ისე გაგრძელდა, როგორც დღესაა. ფაქტობრივად, საჯარო გამოსვლებში, “ქართული ოცნების” ლიდერები ანტიდასავლური პროპაგანდის თანამონაწილეები არიან და ამაზეც გვქონდა საუბარი.
“ქართულ ოცნებას” არ უნდა შარლ მიშელის შეთანხმების შესრულება, მაგრამ დღეს ჩვენ მივიღეთ იმის გარანტია, რომ სრული მხარდაჭერა გვექნება ევროკავშირის მხრიდან და შესრულდება შეთანხმება, მათ შორის, მართლმსაჯულების მხრივ და სხვა მიმართულებითაც.
ვისაუბრეთ ასევე 5 ივლისის ძალადობის ფაქტებზეც, რაც იყო ჟურნალისტებთან მიმართებაში. კონკრეტულად ვუთხარით ფაქტების შესახებ, რომ პოლიციამ არა თუ ვერ, – არ დაიცვა ჟურნალისტები, არ დაიცვა საქართველოს მოქალაქეები. უფრო მეტიც, “კორიდორებს” უკეთებდა მოძალადე ჯგუფებს იმისთვის, რომ თავს დასხმოდნენ კონკრეტულ ადამიანებს.
ყოველივე ეს აჩვენებს, რომ ჩვენ ყველანი უნდა გავერთიანდეთ და საქართველო დავაბრუნოთ ევროპული განვითარების გზაზე,” – განაცხადა გიორგი ვაშაძემ.
