დროებითი საგამოძიებო კომისიის სხდომაზე დღეს ცენტრალური საარჩევნო კომისიის თავმჯდომარეს, თამარ ჟვანიას მოუსმინეს, რის შემდეგაც მან კომენტარი გააკეთა ჟურნალისტებთან და აღნიშნა, რომ მიუხედავად ხარვეზებისა და დაშვებული შეცდომებისა, არჩევნები მაინც ვერ ჩაითვლება გაყალბებულად:
“არჩევნებზე იყო გარკვეული ტიპის ხარვეზები, ასევე დაშვებული პროცედურული შეცდომები, თუმცა აქ არაფერი არ იყო ახალი და განსხვავებული, რომელიც წინა არჩევნებზე არ ყოფილა.
იყო ის მიზეზები, რომლებიც უკავშირდება ზოგადად პოლიტიკურ გარემოს, ძალიან რთულ და კომპლექსურ ვითარებაში მუშაობას, ამავდროულად სუბიექტების უპრეცედენტოდ მაღალ რაოდენობას და რაც მთავარია, პანდემიას.
გარკვეულწილად არჩევნები იყო ხარვეზიანი და მათი მასშტაბები გარკვეული პროცენტით იყო უფრო მეტი, ვიდრე წინა არჩევნებზე, თუმცა ეს არ იყო გაყალბებული არჩევნები“, – აღნიშნა თამარ ჟვანიამ.
აქვე საყურადღებოა თამარ ჟვანიას განცხადება საგამოძიებო კომისიაზე დასმულ შეკითხვასთან, კერძოდ მის თამამდებობაზე ყოფნასთან დაკავშირებით, რაზეც ცალსახა პასუხს იძლევა, რომ გადადგომას არ აპირებს და მისი თანამდებობაზე ყოფნა ცესკოს ადმინისტრაციის გადასაწყვეტია და არა პარტიების:
“გადადგომის და წასვლა-დარჩენის საკითხს, ეს უნდა იყოს საარჩევნო ადმინისტრაციის გადასაწყვეტი! ვერც ერთ პოლიტიკურ ძალას, ვინც არ უნდა იყოს ის, არ უნდა ჰქონდეს საშუალება და არ უნდა შეიქმნას პრეცედენტი, რომ მისი პოლიტიკური სურვილის გამო ადმინისტრატორები იცვლებოდნენ.
შეურაცხყოფის პირობებში მე ვიყავი ძლიერი, ძლიერი ვიყავი იმიტომ, რომ ჩემს და ჩვენს უკან, საარჩევნო ადმინისტრაციის უკან იდგა სიმართლე,” – განაცხადა თამარ ჟვანიამ.
