“შარლ მიშელის რეფორმების ჯგუფი” – ასე ჰქვია ფრაქციას, რომელიც დღეს შევქმენით – გიორგი ვაშაძე

117

საქართველოს პარლამენტში დღეს ოპოზიციურმა სპექტრმა შექმნა ახალი ფრაქცია, რომლის წინაპირობა გახდა შარლ მიშელის დოკუმენტი და ის რეფორმები, რისი რეალიზების პასუხისმგებლობაც ხელმომწერმა პარტიებმა აიღეს. ფრაქციაში გაერთიანდა 3 პოლიტიკური ძალა და უპარტიო დეპუტატები:

,,პარლამენტში დღეს კიდევ ერთი ფრაქცია შეიქმნა. ,,შარლ მიშელის რეფორმების ჯგუფი“ – ასე ჰქვია ფრაქციას, რომელიც დღეს შევქმენით, იგი არის მრავალპარტიული და მასში გაერთიანებულები არიან ასევე დამოუკიდებელი დეპუტატები, რომლებიც მართლაც დაგვეხმარნენ – ზურა ჯაფარიძე დაგვეხმარა, რომ ფრაქცია შეგვექმნა.

ვფიქრობ, რომ ეს მნიშვნელოვნია!

პირველ რიგში, ფრაქცია – ეს არის მექანიზმი უფრო ეფექტურად ვიმუშაოთ პარლამენტში. ფრაქციის სახელწოდება ,,შარლ მიშელის რეფორმების ჯგუფი“ მოდის იმ შეთანხმებიდან, რომლის საფუძველზეც შემოვედით ამ პარლამენტში და რომელი შეთანხმების რეალიზებაზეც ავიღეთ პასუხისმგებლობა ჩვენი ამომრჩევლის წინაშე.

  • ფრაქციის ხელმძღვანელი იქნება ქალბატონი ხათუნა სამნიძე;
  • ფრაქციის თავმჯდომარის მოადგილე იქნება ბატონი პაატა მანჯგალაძე;
  • ფრაქციის აპარატს უხელმძღვანელებს ბატონი სერგო ჩიხლაძე.

ეს არის ის მენეჯმენტი, რომელიც გვექნება ფრაქციაში. ჩვენი ფრაქციის მთავარი მიზანია, ვიყოთ ხალხის ხმა პარლამენტში და გავაკეთოთ მაქსიმუმი იმისათვის, რომ საქართველოს მოქალაქეებმა იგრძნონ, პოლიტიკა/პარლამენტი არის მათთვის და არა მხოლოდ ელიტისთვის, რომლებიც მხოლოდ ელიტისტურ თემებზე საუბრობს ხოლმე.

ჩვენი მიზანია ვისაუბროთ ხალხის პრობლემებზე და ვაიძულოთ ,,ქართული ოცნებას“, როგორც შეთანხმების შერულება, ასევე, რაც ყველაზე მნიშნელოვანია, ხალხის საჭირბოროტო საკითხებზე კონკრეტული პასუხი გაგვცეს და მისცეს ხმა, როგორიცაა: საპესიო, უმუშევრობის, წამლის ფასები, სასამართლო რეფორმა, უამრავი საკითხი, რომლებსაც ჩვენ ვამუშავებთ.

ჩვენ ვიქნებით ყველაზე აქტიური ჯგუფი იმისათვის, რომ მალე ცვლილებები შევიტანოთ ქვეყანაში“, – განაცხადა გიორგი ვაშაძემ

შეთანხმების შესაბამისად ფრაქცია ,,შარლ მიშელის რეფორმების ჯგუფის“ ხელმძღვანელი იქნება ,,რესპუბლიკური“ პარტიის თავმჯდომარე ხათუნა სამნიძე. ფრაქციაში გაერთიანებულია 3 პოლიტიკური პარტია და ინდივიდუალური დეპუტატები: ,,სტრატეგია აღმაშენებელი“, ,,გირჩი – მეტი თავისუფლება“, ,,რესპუბლიკური პარტია“ და დამოუკიდებელი დეპუტატები, პრეზიდენტობის კანდიდატი გრიგოლ ვაშაძე და უპარტიო დეპუტატი ტარიელ ნაკაიძე.

ავტორი
ნინი ხიჯაკაძე

კომენტარები პუბლიკაციაზე